अपात्र अधिकाऱ्याला थेट उपायुक्तपदी – काँग्रेसची टीका
ठाणे, दि. ३ : अजय मगरे
ठाणे महापालिकेत भ्रष्टाचाराच्या छायेखाली थेट अपात्र अधिकाऱ्याला उपायुक्तपदी बसवण्यात आल्याचा गंभीर आरोप ठाणे शहर काँग्रेसचे मुख्य प्रवक्ते राहुल पिंगळे यांनी केला आहे.
शंकर पाटोळे यांची सहाय्यक आयुक्त पदालाच शासनाची आजवर मान्यता नसताना, त्यांची थेट उपायुक्त पदावर नियुक्ती ही महापालिकेच्या कारभारातील धक्कादायक बेकायदेशीरता असल्याचा काँग्रेसचा दावा आहे.
गंभीर आरोपांची मालिका
काँग्रेसने दिलेल्या माहितीनुसार, पाटोळे यांच्या कार्यकाळात बीएसयुपी अनियमितता, अँटी करप्शन ब्युरोतील तक्रारी, अनधिकृत बांधकामांना दिलेले संरक्षण, तसेच नागरिकांकडून आलेल्या तक्रारी प्रलंबित आहेत. “अशा पार्श्वभूमीवर त्यांच्या पदोन्नतीस मान्यता नसताना त्यांना उपायुक्तपदी नेमणे म्हणजे ठाणेकरांच्या विश्वासाशी केलेला विश्वासघात आहे,” असा थेट आरोप पिंगळे यांनी केला.
राजकीय आशीर्वादाचा आरोप
“आम्ही अनेकदा पुराव्यानिशी आयुक्तांकडे तक्रारी दाखल केल्या. तत्कालीन काँग्रेस प्रदेशाध्यक्ष नाना पाटोळे यांनीसुद्धा या अधिकाऱ्याच्या भ्रष्ट कारकीर्दीबाबत शासनाला पत्र दिले होते. तरीदेखील या अधिकाऱ्याला राजकीय आशीर्वादाने अभय देण्यात आले. ठाणेकरांची ही थेट फसवणूक आहे,” असे काँग्रेसने स्पष्ट केले.
राहुल पिंगळे यांनी पुढे सांगितले की, “आम्ही लवकरच महापालिकेतील सार्वजनिक बांधकाम, स्थावर मालमत्ता, घनकचरा आणि शहर विकास विभागातील भ्रष्टाचाराचे पुरावे जनतेसमोर आणणार आहोत. आयुक्तांनी राजकीय दबावाला बळी न पडता कारवाई केली नाही, तर काँग्रेस रस्त्यावर उतरून ठाणेकरांसाठी लढेल.”
दरम्यान, न्यायालयीन चौकशीची चर्चा सुरू होताच, शंकर पाटोळे यांच्या नियुक्तीवरून ठाण्यातील राजकीय वर्तुळात चांगलीच खळबळ माजली आहे. ठाणेकर नागरिकांचा सवाल आता एकच
“भ्रष्टाचाराला अभय देणाऱ्या सूत्रधारांवरही कारवाई होणार का?”
