वार्ड क्र. १७३ महिलांसाठी आरक्षित ; दिग्गजांचे स्वप्न भंगले!
मुंबई, दि. १३ : मंगेश म्हात्रे
मुंबई महानगरपालिका निवडणूक २०२६ साठी जाहीर झालेल्या सोडतीत सायन येथील वार्ड क्र. १७३ (प्रतीक्षा नगर) हा सर्वसाधारण महिला प्रवर्गासाठी आरक्षित ठरल्याने स्थानिक राजकारणात चांगलीच रंगत आली आहे. या निर्णयामुळे अनेक पुरुष दिग्गजांचे नगरसेवकपदाचे स्वप्न धुळीस मिळाले असून, महिला नेत्यांसाठी राजकीय संधीची नवी दारे खुली झाली आहेत.
संभाव्य उमेदवारांच्या नावांवर चर्चा :
या वार्डात सध्या शिवसेना (ठाकरे गट), शिवसेना (शिंदे गट) आणि भाजप यांच्यात चुरस अपेक्षित आहे.
ठाकरे गटातून माजी नगरसेविका प्रणिता वाघधरे, भाजपकडून शिल्पा केळुसकर, वैशाली पगारे आणि अर्चना जाधव तर शिंदे गटातून निकिता पवार यांची नावे संभाव्य उमेदवार म्हणून चर्चेत आहेत. जर शिंदे गट आणि भाजप यांच्यात युती साधली नाही, तर या वार्डात तिरंगी लढत रंगण्याची दाट शक्यता आहे.
महायुतीत समन्वयाचा अभाव :
कागदावर महायुती बलाढ्य वाटत असली, तरी स्थानिक स्तरावर शिंदे गट आणि भाजप यांच्यात समन्वयाचा अभाव जाणवतो. दोन्ही पक्षातील गटबाजी ही मोठी डोकेदुखी ठरू शकते. त्यामुळे महायुतीच्या वरिष्ठ नेत्यांना या मतदारसंघात गटबाजी मिटविण्यासाठी प्रयत्न करावे लागणार आहेत.
महाविकास आघाडीचे समीकरणही रंजक :
महाविकास आघाडीमध्ये शिवसेना ठाकरे गटाच्या प्रणिता वाघधरे यांच्या उमेदवारीची चर्चा रंगली आहे. शिवसेना (ठाकरे गट) आणि मनसे युतीला अधिकृत मान्यता मिळालेली नसली, तरी दोन्ही पक्षांचे स्थानिक कार्यकर्ते पातळीवर समन्वय साधण्याचे प्रयत्न सुरू आहेत.
मराठी मतदार निर्णायक ठरणार:
प्रतीक्षा नगर हा प्रामुख्याने मराठी भाषिक परिसर असल्याने ठाकरे गटाला नैसर्गिक फायदा होण्याची शक्यता आहे. मात्र नव्या मतदारांची भूमिका निर्णायक ठरणार असून, गाफील राहिल्यास कोणत्याही पक्षाचे समीकरण उलटू शकते.
वार्ड क्र.१७३ मध्ये महिलांसाठी संधी खुली झाल्याने सायन प्रतीक्षा नगरचा राजकीय रंगमंच सज्ज झाला आहे. आगामी काळात निवडणूक कार्यक्रम जाहीर होऊन राजकीय पक्षांकडून उमेदवारांची घोषणा होताच निवडणुकीचा माहोल चांगलाच तापणार आहे.
