कोपरगांव, दि. २७ ( दिपक साटोटे )
कोपरगांव तालुक्यातील कोळपेवाडी येथे भोई समाजातील संत शिरोमणी भिमा भोई महाराज यांच्या जयंतीनिमित्त लावण्यात आलेला भव्य बॅनर अज्ञात व्यक्तींनी फाडून टाकल्याची धक्कादायक घटना घडली आहे.
या घटनेमुळे संपूर्ण भोई समाजात तीव्र संताप व्यक्त करण्यात येत असून, समाजातील युवकांनी कोपरगांव पोलीस ठाणे ग्रामीण येथे लेखी निवेदन देऊन या प्रकाराचा निषेध करत दोषींवर तात्काळ कारवाईची मागणी केली आहे.
सदर बॅनरवर भगवान महादेव व छत्रपती शिवाजी महाराज यांचेही छायाचित्र होते. त्यामुळे हा प्रकार केवळ बॅनर फाडण्यापुरता मर्यादित नसून, भोई समाजाची जाणीवपूर्वक छेडछाड करून धार्मिक व सामाजिक भावना दुखावण्याचा प्रयत्न असल्याचा आरोप भोई समाज युवा सेवा संघाने केला आहे.
भोई समाजाचे प्रतिनिधी सदाभाऊ साटोटे यांनी सांगितले की, “ही घटना अत्यंत निंदनीय असून, समाजाच्या श्रद्धास्थानांचा अपमान झाला आहे. लवकरात लवकर दोषींवर कठोर कारवाई झाली नाही, तर भोई समाज तीव्र आंदोलन छेडेल.”
या प्रकरणी पोलिसांनी गुन्हा नोंदवून चौकशी सुरू केली आहे. स्थानिक पातळीवर तणावाचे वातावरण निर्माण झाले असून, प्रशासनाकडून शांतता राखण्याचे आवाहन करण्यात येत आहे.
