मुंबई, दि. २५ (प्रतिनिधी)
हिंदी भाषा सक्तीविरोधात महाराष्ट्र नवनिर्माण सेनेच्या वतीने आज माटुंगा लेबर कॅम्प येथील डॉ. बाबासाहेब आंबेडकर चौकात ‘ एक सही हिंदी सक्ती विरोधाची ‘ जोरदार सह्यांची मोहीम अभियान राबविण्यात आले. या अभियानाला स्थानिक नागरिकांचा उत्स्फूर्त प्रतिसाद लाभला.
या मोहिमेचे नेतृत्व मनसेचे शाखा अध्यक्ष सूर्यकांत भालेकर यांनी केले. यावेळी विभाग अध्यक्ष राजेश सोनवणे, उपविभाग अध्यक्ष विजय पोळ, माजी विभाग अध्यक्ष राजेश शर्मा, महिला विभाग अध्यक्षा भारती कळंबे, उपविभाग अध्यक्षा ललिता पोळ, तसेच महाराष्ट्र नवनिर्माण विद्यार्थी सेनेचे विभाग अध्यक्ष जिगर मोरे हे उपस्थित होते.
अभियानात मनसेच्या रेश्मा रामटेके, मुतू लक्ष्मी, तसेच अहिल्या जनवादी संघाच्या अध्यक्षा आशा काशीनाथ, दिपाली वारंग, अंजना निवाते यांनीही सक्रिय सहभाग नोंदवला.
यावेळी नागरिकांनी मोठ्या संख्येने सह्या करत हिंदी सक्तीविरोधात आपला निषेध नोंदविला. भाषिक अस्मितेच्या रक्षणासाठी जनजागृती होणे आवश्यक असल्याचे आयोजकांनी यावेळी स्पष्ट केले.
सूर्यकांत भालेकर म्हणाले, “मराठी ही राज्याची अभिजात आणि अस्मितेची भाषा आहे. तिच्या अस्तित्वावर गदा येईल, अशा कोणत्याही प्रकारच्या भाषिक सक्तीचा आम्ही तीव्र निषेध करतो. ही लढाई केवळ भाषेची नव्हे, तर स्वाभिमानाची आहे, आणि या लढ्यात सामान्य नागरिक आमच्यासोबत ठामपणे उभे आहेत.”
