मुंबई, दि. १२ : मंगेश म्हात्रे :
मुंबईतील म्हाडाच्या संक्रमण शिबिरांमध्ये वास्तव्यास असलेल्या रहिवाश्यांच्या पात्रतेसाठी म्हाडानं मोठा पाऊल उचलत बायोमेट्रिक सर्वेक्षणाला सुरुवात केली आहे. या सर्वेक्षणाअंती म्हाडाकडून १० हजार ७७२ रहिवाशांची तात्पुरती यादी जाहीर करण्यात आली असून ती म्हाडाच्या अधिकृत संकेतस्थळावर उपलब्ध आहे.
ही यादी अधिकृत, अपात्र आणि अनधिकृत अशा तीन श्रेणींमध्ये विभागली जाणार असून त्यानंतरच अंतिम यादी जाहीर होईल, अशी माहिती म्हाडाच्या इमारत दुरुस्ती व पुनर्रचना मंडळातील संक्रमण शिबिर विभागाच्या अधिकाऱ्यांनी दिली.
म्हाडाकडून स्पष्ट करण्यात आलं आहे की, पात्रतेसाठी प्रत्येक रहिवाशाने आपली बायोमेट्रिक नोंदणी वेळेत पूर्ण करणं आवश्यक आहे. “ज्यांनी अद्याप बायोमेट्रिक नोंदणी केलेली नाही, त्यांनी ती तातडीने पूर्ण करावी. अन्यथा अशा व्यक्तींना अनधिकृत ठरवून म्हाडा अधिनियम, १९७६ च्या कलम ९५(अ)(३) नुसार थेट निष्कासनाची कारवाई करण्यात येईल,” असा इशारा अधिकाऱ्यांनी दिला.
“रहिवाशांनी वेळेत बायोमेट्रिक नोंद न केल्यास त्यांना अधिकृत घुसखोर मानलं जाईल आणि थेट हकालपट्टी केली जाईल,” असंही त्यांनी स्पष्ट केलं.
दरम्यान, बायोमेट्रिक यादी जाहीर झाल्यानंतर संक्रमण शिबिरांमध्ये रहिवाशांमध्ये संभ्रम आणि खळबळ उडाली आहे. काही रहिवाश्यांची नोंदणी पूर्ण असूनही त्यांच्या नावांचा तात्पुरत्या यादीत समावेश न झाल्याने ते चिंतेत आहेत. असून सदर यादीत दुरुस्त्या करण्याची मागणी रहिवाशांकडून केली जात आहे.
या विषयी म्हाडाच्या इमारत दुरुस्ती व पुनर्रचना मंडळातील संक्रमण शिबिर विभागाचे उपमुख्य अधिकारी मोहन बोबडे यांनी सांगितले कि बायोमेट्रिक सर्व्हे झालेल्या संक्रमण शिबिरातील रहिवाश्यांची तात्पुरती यादी जाहीर केली असून या यादीतील अधिकृत, अपात्र आणि अनधिकृत अशा तीन श्रेणींमध्ये विभागणी झाल्यानंतरच अंतिम यादी प्रसिद्ध करण्यात येईल.
