धाराशिवात म्हाडाची २० हजार वृक्ष लागवड मोहीम; पालकमंत्री सरनाईक यांच्या हस्ते शुभारंभ
धाराशिव, ता. २० : मंगेश म्हात्रे
म्हाडाच्या छत्रपती संभाजीनगर मंडळातर्फे वनमहोत्सवाच्या निमित्ताने जिल्ह्यातील जेवळी (ता. लोहारा) व कास्ती बुद्रुक येथे २० हजार वृक्ष लागवडीच्या मोहिमेला पालकमंत्री तथा परिवहन मंत्री प्रताप सरनाईक यांच्या हस्ते उत्साहात प्रारंभ झाला.
या वेळी माजी खासदार रवींद्र गायकवाड, माजी आमदार ज्ञानराज चौगुले, जिल्हाधिकारी किर्ती किरण पुजार, म्हाडाचे उपाध्यक्ष संजीव जयस्वाल, छत्रपती संभाजीनगर मंडळाचे मुख्य अधिकारी दत्तू नवले, जेवळीच्या सरपंच महानंदा पणुरे, उपसरपंच बसवराज कारभारी आदी मान्यवर उपस्थित होते.
जुलै महिन्यात साजरा होणाऱ्या वनमहोत्सवानिमित्त म्हाडाने राज्यभरात दोन लाख झाडे लावण्याचे उद्दिष्ट ठरवले असून मुंबईसह पुणे, नाशिक, नागपूर, अमरावती आणि छत्रपती संभाजीनगर मंडळांमध्ये मोहिम राबवली जात आहे. पहिल्या टप्प्यात मुंबईत ५० हजार, कोकणात २५ हजार, तर उर्वरित विभागीय मंडळांमध्ये प्रत्येकी २५ हजार झाडे लावली जाणार आहेत.
नाशिकमधील निमोण येथे जैवविविधता उद्यानात १५ हजार झाडे लावण्यात आली असून, सोलापूर जिल्ह्यातील कुंभारी येथील रे नगर गृहनिर्माण प्रकल्पात पुणे मंडळातर्फे २० हजार झाडांची लागवड सुरू झाली आहे, अशी माहिती अधिकाऱ्यांनी दिली. यावेळी मुख्य अधिकारी मिलिंद शंभरकर , सह मुख्याधिकारी उमेश वाघ, वंदना सूर्यवंशी आदी उपस्थित होते.
