ठाणे, दि. २६ ( अजय मगरे )
धर्मवीर आनंद दिघे शासकीय औद्योगिक प्रशिक्षण संस्था, ठाणे येथे आज कारगिल विजय दिवस अत्यंत उत्साहात व सन्मानपूर्वक साजरा करण्यात आला. भारताच्या शौर्याचा आणि बलिदानाचा प्रतीक असलेल्या या दिवशी संस्थेने देशभक्तीचे महत्त्व अधोरेखित करणारे विविध उपक्रम आयोजित केले.
कार्यक्रमाचे प्रमुख वक्ते म्हणून विजय दुपटे यांनी उपस्थितांना उद्देशून प्रभावी आणि प्रेरणादायी भाषण केले. त्यांच्या आवेशपूर्ण शैलीने सर्व श्रोते मंत्रमुग्ध झाले. विद्यार्थ्यांमध्ये देशप्रेम, त्याग व समर्पणाची भावना जागृत करावी, हा त्यांचा मुख्य संदेश होता.
कार्यक्रमाच्या निमित्ताने निबंध स्पर्धा व वक्तृत्व स्पर्धांचे आयोजन करण्यात आले होते. या स्पर्धांमध्ये प्रशिक्षणार्थींनी उत्स्फूर्तपणे सहभाग नोंदवला. विजेत्या विद्यार्थ्यांना सन्मानचिन्ह व प्रमाणपत्र देऊन गौरविण्यात आले.
कार्यक्रमाचे आयोजन संस्थेचे प्राचार्य व सर्व कर्मचारी वर्ग यांच्या सहकार्याने यशस्वीपणे पार पडले. देशासाठी बलिदान दिलेल्या वीर जवानांच्या स्मृतीला अभिवादन करत उपस्थितांनी “जय हिंद” च्या घोषणा दिल्या आणि राष्ट्राभिमानाने भारावलेला क्षण अनुभवला.
