मुंबई, दि ७ : प्रतिनिधी
मलेशियातील कुचिंग येथे पार पडलेल्या दहाव्या आशियन पारा तायक्वांदो पूम्से चॅम्पियनशिप २०२५ स्पर्धेत भारताचा खेळाडू आनंद मारुती धोंडे यांनी सुवर्णपदक जिंकत भारताचा झेंडा उंचावला.
आशियातील अनेक देशांतील अव्वल पारा तायक्वांदो खेळाडूंच्या सहभागाने झालेल्या या स्पर्धेत धोंडे यांनी उत्कृष्ट तंत्र, वेगवान हालचाली यांचा प्रभावी वापर करत सर्व प्रतिस्पर्ध्यांवर मात केली. अंतिम फेरीत त्यांनी दमदार कामगिरी करत सुवर्णपदकाची खात्री केली.
सुवर्णपदक जिंकत भारताचा झेंडा उंचावणारे आनंद धोंडे यांचा मुंबईत फिनिक्स मार्शल आर्ट क्लास तर्फे भव्य सत्कार करण्यात आला.
धोंडे यांच्या सुवर्ण विजयाने भारताला आंतरराष्ट्रीय पातळीवर मान मिळवून दिला. या सत्कार सोहळ्यात फिनिक्स मार्शल आर्ट क्लासचे प्रशिक्षक राजेश खिल्लारी सर,सहकारी खेळाडू तसेच क्रीडाप्रेमी मोठ्या संख्येने उपस्थित होते. धोंडे यांना स्मृतिचिन्ह, पुष्पगुच्छ देऊन गौरविण्यात आले.
भारताच्या पारा तायक्वांदो संघाने या स्पर्धेत एकूण १६ पदके जिंकली. धोंडे यांनी या यशाचे श्रेय आपल्या प्रशिक्षक ,कुटुंबीय आणि सहकाऱ्यांना देत, “हे सुवर्णपदक मी माझ्या देशाला आणि मला साथ देणाऱ्या सर्वांना समर्पित करतो” असे सांगितले.
या सुवर्ण कामगिरीनंतर त्यांच्या मूळ गावात आणि क्रीडा क्षेत्रात जल्लोषाचा माहोल असून, अनेकांनी सोशल मीडियावरून त्यांचे अभिनंदन केले आहे.
