मुंबईपुणे-लोणावळा रेल्वे व पुणे मेट्रो प्रकल्पांना हिरवा कंदील
, दि.१९ : अजय मगरे
राज्यातील वाहतूक आणि शहरी विकासाला गती देणारे अनेक महत्त्वाचे निर्णय मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ पायाभूत सुविधा समितीच्या बैठकीत घेण्यात आले. या निर्णयांमुळे मुंबई, पुणे, ठाणे, नवी मुंबई आणि नागपूरसह राज्यातील मोठ्या शहरांच्या पायाभूत सुविधांना नवे बळ मिळणार आहे, असे मुख्यमंत्र्यांनी स्पष्ट केले.
बैठकीत पुणे–लोणावळा उपनगरीय रेल्वे मार्गावर तिसरी व चौथी मार्गिका उभारणीस मान्यता देण्यात आली. यामुळे पुणे–लोणावळा कॉरिडॉर अधिक सक्षम होणार असून औद्योगिक, निवासी व व्यावसायिक क्षेत्राला आवश्यक ती कनेक्टिव्हिटी मिळणार आहे. तसेच पुणे शहरातील वाढत्या वाहतुकीचा ताण कमी होणार आहे.
याचबरोबर पुणे मेट्रोच्या टप्पा-१ अंतर्गत दोन नवीन स्थानकांना मंजुरी देण्यात आली आहे. बालाजीनगर–बिबवेवाडी व स्वारगेट–कात्रज या मेट्रो स्थानकांच्या उभारणीमुळे पुणेकरांना अधिक सोयीस्कर प्रवासाची सुविधा मिळणार आहे.
ठाणेकर आणि नवी मुंबईकरांसाठीही महत्त्वाचा निर्णय घेण्यात आला आहे. ठाणे ते नवी मुंबई आंतरराष्ट्रीय विमानतळादरम्यान २५ किलोमीटर लांबीचा एलिव्हेटेड रोड उभारण्यास मंजुरी देण्यात आली. या प्रकल्पामुळे ठाणे, नवी मुंबई तसेच मधल्या औद्योगिक क्षेत्रांना वेगवान आणि समर्पित दळणवळण मार्ग उपलब्ध होणार असून भविष्यातील शहरी विकासाला गती मिळणार आहे.
