हरकती व सूचना नोंदविण्याची मुदत १५ सप्टेंबरपर्यंत वाढवली..
ठाणे, दि.२६ : अजय मगरे
किसन नगर, हनुमान नगर, अंबिका नगर तसेच लोकमान्य नगर परिसरातील रहिवाशांसाठी ठाणे महापालिकेकडून महत्त्वाची घोषणा करण्यात आली आहे. समूह विकास योजनेअंतर्गत तयार केलेल्या प्रारुप याद्यांवरील हरकती व सूचना दाखल करण्याची मुदत वाढवून १५ सप्टेंबर २०२५ पर्यंत करण्यात आली आहे.
ठाणे महापालिकेच्या क्लस्टर सेलतर्फे नागरी पुनरुत्थान आराखडा (यु.आर.पी) क्र. १२ व १३ अंतर्गत या भागातील भोगवटाधारकांचे सर्वेक्षण करून तयार केलेली यादी १६ जुलै २०२५ रोजी प्रसिद्ध करण्यात आली होती. या यादीत नाव, हक्क किंवा माहिती संदर्भात कोणाला काही हरकत अथवा सूचना द्यायची असल्यास त्यांनी ती आता १५ सप्टेंबरपर्यंत नोंदवावी, असे आवाहन करण्यात आले आहे.
किसन नगर, हनुमान नगर, अंबिका नगर (यु.आर.पी क्र. १२ – यु.आर.सी. क्र. ४ व ६)
लोकमान्य नगर परिसरातील खुशबु अपार्टमेंट ते हरी ओम अपार्टमेंट, शास्त्री नगर, वर्तक नगर, यशोधन नगर, डवले नगर, लोकमान्य पाडा क्र. २ (यु.आर.पी क्र. १३ – यु.आर.सी. क्र. ३)
हरकती व सूचना दाखल करण्यासाठी ठाणे महापालिकेच्या क्लस्टर सेल, शहर विकास विभाग, धर्मवीर आनंद दिघे प्रशासकीय इमारत, कशिश पार्क, एल.बी.एस. मार्ग, ठाणे (प.) या कार्यालयाशी संपर्क साधावा किंवा clustercell@thanecity.gov.in या ई-मेलवरही माहिती पाठवता येईल. नागरिकांनी आपल्या हक्कांबाबत जागरूक राहून, वेळेत हरकती/सूचना नोंदवून सहकार्य करावे, असे आवाहन प्राधिकृत अधिकारी मिलिंद पाटील व किशोर गोळे यांनी ठाणे महापालिका संकेत स्थळावर प्रसिध्द केले आहे.
