मुंबई, दि. ९ : मंगेश म्हात्रे
धारावीतील विद्यार्थ्यांच्या बौद्धिक क्षमतेला चालना देण्यासाठी नव भारत मेगा डेव्हलपर्स प्रायव्हेट लिमिटेड (एनएमडीपीएल) आणि अदानी ग्रुप यांच्या संयुक्त विद्यमाने ‘धारावी स्कूल्स बुद्धिबळ अजिंक्यपद स्पर्धा २०२५’ चे भव्य आयोजन करण्यात आले आहे. येत्या १२ डिसेंबर रोजी जिल्हा क्रीडा क्लब, धारावी येथे होणाऱ्या या स्पर्धेत परिसरातील ३० पेक्षा अधिक शाळांमधील २०० हून अधिक विद्यार्थी सहभागी होणार आहेत.
बुद्धिबळ या मेंदूला धार लावणाऱ्या खेळामधून विद्यार्थ्यांच्या संज्ञानात्मक क्षमतेत आणि धोरणात्मक विचारात वाढ व्हावी, आत्मविश्वासाची जोपासना व्हावी, यासाठी हा उपक्रम राबवला जात आहे. समग्र विकासासाठी क्रीडा आणि शिक्षण यांची सांगड घालण्यावर आयोजकांचा भर आहे.
या स्पर्धेची खास आकर्षक बाब म्हणजे भारतीय बुद्धिबळ तारा आर. प्रज्ञानंद यांची उपस्थिती. ते विद्यार्थ्यांसमोर प्रदर्शनीय खेळ सादर करणार असून, लक्ष केंद्रीकरण, शिस्त, संयम आणि स्पर्धात्मकतेची सांगड कशी घालायची याबाबत मार्गदर्शनही करणार आहेत.
धारावीच्या पुनर्विकासाकडे फक्त बांधकाम-केद्री प्रकल्प म्हणून न पाहता मानवी भांडवलात गुंतवणूक म्हणून पाहण्याचा एनएमडीपीएलचा दृष्टीकोन या स्पर्धेतून स्पष्ट दिसून येतो. अदानी ग्रुपच्या तळागाळातील क्रीडा विकास मोहिमेलाही या उपक्रमामुळे नवे बळ मिळत आहे.
शिक्षक, विद्यार्थी आणि स्थानिक नागरिक यांच्या उत्स्फूर्त प्रतिसादामुळे धारावीत एका प्रेरणादायी आणि स्पर्धात्मक वातावरणाची निर्मिती होणार असून, तरुणाईला मोठी स्वप्ने पाहण्यासाठी आणि ती गाठण्यासाठी या स्पर्धेचे व्यासपीठ उपयुक्त ठरणार आहे, असा आयोजकांचा विश्वास आहे
