बनावट प्रमाणपत्र प्रकरणात कडक कारवाई – सचिव तुकाराम मुंढे
मुंबई, दि.५ : अजय मगरे
दिव्यांग व्यक्तींना दिले जाणारे वैश्विक दिव्यांग ओळखपत्र (यूडीआयडी) हे शासकीय व निमशासकीय नोकऱ्यांमधील आरक्षण, विविध शासकीय योजना, आर्थिक सवलती तसेच इतर लाभांसाठी अत्यंत महत्त्वाचे दस्तऐवज आहे. मात्र, अलीकडे काही ठिकाणी बनावट अथवा चुकीच्या वैद्यकीय तपासणी अहवालांच्या आधारे यूडीआयडी कार्ड मिळविण्याचे प्रकार समोर येत असल्याने गंभीर चिंता व्यक्त करण्यात येत आहे. या प्रकारांमुळे खऱ्या दिव्यांग व्यक्तींवर अन्याय होत असून, यूडीआयडी कार्ड जारी करण्यापूर्वी संबंधित वैद्यकीय तपासणी अहवालांची काटेकोर पडताळणी करणे आवश्यक असल्याचे दिव्यांग कल्याण विभागाचे सचिव तुकाराम मुंढे यांनी स्पष्ट केले आहे.
चुकीचे अथवा बनावट दिव्यांगत्व प्रमाणपत्र घेणे किंवा देणे हा कायद्याने गुन्हा असून, अशा प्रकरणांमध्ये दिव्यांग व्यक्ती हक्क अधिनियम, २०१६ अंतर्गत दोषींवर कडक कारवाई करण्यात येणार असल्याचा इशाराही सचिव मुंढे यांनी दिला आहे.
सचिव मुंढे यांनी सांगितले की, अली यावर जंग नॅशनल इन्स्टिट्यूट ऑफ स्पीच अँड हिअरिंग डिसॅबिलिटीज (AYJNISHD) येथे प्रत्यक्ष तपासणी न करता तयार केलेले बनावट अहवाल तसेच संस्थेच्या अधिकृत तपासणीवर आधारित नसलेले अहवाल राज्य व केंद्र शासनाच्या विविध सवलती व लाभ मिळविण्यासाठी सादर केल्याचे काही प्रकरणांमध्ये निदर्शनास आले आहे.
या पार्श्वभूमीवर, यूडीआयडी कार्ड या संस्थेमार्फत जारी झाल्याचे दर्शविणारे सर्व श्रवण व भाषण तपासणी अहवाल पडताळणीसाठी संस्थेच्या अधिकृत ayjnihh-mum@nic.in
या ई-मेल पत्त्यावर पाठविणे अनिवार्य असल्याचे प्रसिद्धीपत्रक अली यावर जंग नॅशनल इन्स्टिट्यूटने काढले आहे. संबंधित कार्यालयांनी तात्काळ कार्यवाही करावी, तसेच चुकीची माहिती देऊन दिव्यांगत्व प्रमाणपत्र अथवा लाभ घेऊ नयेत, असे आवाहनही सचिव तुकाराम मुंढे यांनी केले आहे.
