दर्जेदार व सुलभ आरोग्य सुविधांसाठी प्रभावी अंमलबजावणी आवश्यक;
आरोग्य राज्यमंत्री मेघना साकोरे-बोर्डीकर यांचा भर
मुंबई : अजय मगरे
राज्यातील कामगारांना अधिक दर्जेदार आणि सुलभ आरोग्य सुविधा उपलब्ध करून देण्यासाठी राज्य कामगार विमा योजनेची प्रभावी अंमलबजावणी होणे आवश्यक असल्याचे सार्वजनिक आरोग्य व कुटुंब कल्याण राज्यमंत्री मेघना साकोरे-बोर्डीकर यांनी सांगितले.
निर्मल भवन येथील एमएसआरडीसी कार्यालयात आयोजित बैठकीत त्यांनी राज्य कामगार विमा योजनेचा सविस्तर आढावा घेतला. बैठकीत योजनेअंतर्गत नोंदणीकृत सदस्यांची संख्या, सदस्यांकडून प्राप्त होणारी वर्गणी, विमा योजनेअंतर्गत कार्यरत दवाखाने, नवीन दवाखाने सुरू करण्याबाबतची स्थिती तसेच राज्यातील कामगारांसाठी उपलब्ध खाटांची माहिती यावर सखोल चर्चा करण्यात आली.
कामगारांना आरोग्य सुविधा वेळेत आणि गुणवत्तापूर्ण मिळणे अत्यंत महत्त्वाचे असल्याचे सांगत साकोरे-बोर्डीकर यांनी विमा योजनेअंतर्गत सुरू असलेल्या रुग्णालये व दवाखान्यांची कार्यक्षमता वाढविण्याचे निर्देश दिले. औद्योगिक क्षेत्रांमध्ये वाढत्या गरजा लक्षात घेऊन नवीन दवाखाने सुरू करण्याच्या प्रस्तावांवरही यावेळी चर्चा करण्यात आली.
उपचार सुविधांचा घेतला आढावा
कामगार विमा योजनेअंतर्गत उपलब्ध असलेल्या रुग्णखाटा, उपचार सुविधा, वैद्यकीय मनुष्यबळ आणि औषध उपलब्धता याबाबतही बैठकीत आढावा घेण्यात आला. कामगार आणि त्यांच्या कुटुंबीयांना उपचारासाठी कोणत्याही प्रकारची अडचण येऊ नये, यासाठी आवश्यक उपाययोजना करण्याचे निर्देश राज्यमंत्र्यांनी अधिकाऱ्यांना दिले.
राज्यातील वाढत्या औद्योगिकीकरणाच्या पार्श्वभूमीवर कामगारांसाठी आरोग्य सुविधा अधिक सक्षम आणि व्यापक करण्यावर शासनाचा भर असल्याचेही त्यांनी स्पष्ट केले.
