म्हाडाचा मोठा निर्णय; अर्जाची मुदतही वाढवली
मुंबई : मंगेश म्हात्रे
मुंबईत स्वतःचं घर घेण्याचं स्वप्न पाहणाऱ्यांसाठी म्हाडाने मोठा निर्णय घेतला आहे. विक्रोळी (पूर्व) येथील कन्नमवार नगर प्रकल्पातील तब्बल ६१० सदनिका आता केवळ उच्च उत्पन्न गटासाठी (HIG) उपलब्ध करण्यात आल्या आहेत. विशेष म्हणजे, घरांच्या किमतीत ७.५ टक्क्यांची कपात करत प्रत्येक घरासोबत मोफत वाहनतळ देण्याचाही निर्णय घेण्यात आला आहे.
म्हाडाच्या मुंबई मंडळाच्या २०२६ च्या घरसोडतीत एकूण १२२१ सदनिका उपलब्ध आहेत. त्यापैकी मोठा हिस्सा आता उच्च उत्पन्न गटासाठी राखीव करण्यात आल्याने मध्यमवर्गीय अर्जदारांमध्ये चर्चा सुरू झाली आहे.
दरम्यान, अर्जदारांना दिलासा देत ऑनलाईन अर्ज आणि अनामत रक्कम भरण्याची मुदत २८ मेपर्यंत वाढवण्यात आली आहे. इच्छुकांना २८ मे रात्री ११.५९ वाजेपर्यंत अर्ज करता येणार असून, २९ मेपर्यंत अनामत रक्कम भरता येईल.
म्हाडाच्या माहितीनुसार, सुधारित संगणकीय प्रणाली १४ मेपासून अद्ययावत होणार आहे. अंतिम अर्जदारांची यादी १६ जून रोजी जाहीर केली जाणार असून, सोडतीची तारीख आणि वेळ नंतर घोषित केली जाईल.
म्हाडाने नागरिकांना केवळ अधिकृत संकेतस्थळ आणि ‘IHLMS 2.0’ मोबाइल ॲपद्वारेच अर्ज करण्याचे आवाहन केले आहे. तसेच, दलालांच्या आमिषांना बळी पडू नये, असा इशाराही देण्यात आला आहे.
