श्रीनिवास मिलमध्ये गिरणी कामगाराचे घर दाखवून लाखोंची लूट; सहा दलालांवर गुन्हा दाखल
मुंबई : मंगेश म्हात्रे
लोअर परेल येथील श्रीनिवास मिल परिसरात गिरणी कामगाराचे घर मिळवून देण्याचे आमिष दाखवत दोन कुटुंबांची लाखो रुपयांची फसवणूक केल्याचा प्रकार उघडकीस आला आहे. या प्रकरणी एन. एम. जोशी मार्ग पोलीस ठाणे येथे सहा दलालांविरोधात गुन्हा दाखल करण्यात आला आहे.
पहिल्या घटनेत, नितीन शिंदे आणि प्रियांका शिंदे या दाम्पत्याने श्रीनिवास कॉटन मिल येथील गिरणी कामगाराच्या म्हाडा घराची फाईल दाखवून देवेंद्र सोनवणे यांचा विश्वास संपादन केला. बाजारभावापेक्षा कमी दरात ३८ लाखांत घर देण्याचे आश्वासन देत त्यांनी ऑनलाईन व्यवहाराद्वारे सुमारे ३१ लाख रुपये उकळले. मात्र, ना घराचा ताबा दिला ना रक्कम परत केली. या प्रकरणी भादंसं कलम ३४, ४०६, ४२० अन्वये शिंदे दाम्पत्यावर गुन्हा दाखल करण्यात आला आहे.
दुसऱ्या प्रकरणात, चंद्रकला गुराम (वय ५६) यांचीही अशाच पद्धतीने फसवणूक झाली. ब्रोकर राहुल तिवारी याने श्रीनिवास मिल म्हाडा टॉवरमधील घर दाखवून ३८ लाखांत व्यवहार ठरवला. त्यानंतर अनिल मुळीक, प्रदीप खोत आणि आशा सुर्वे यांच्या संगनमताने ऑनलाईन व चेकद्वारे टप्प्याटप्प्याने सुमारे १७ लाख रुपये उकळण्यात आले.
या व्यवहारासाठी एमओयू करून दोन वर्षांत घराचा ताबा देण्याचे आश्वासन देण्यात आले होते. मात्र, मुदत उलटूनही ना घर मिळाले ना पैसे परत मिळाले. वारंवार पाठपुरावा करूनही प्रतिसाद न मिळाल्याने अखेर तक्रार दाखल करण्यात आली असून भादंसं कलम ३४, ४२० अन्वये मुळीक, खोत, सुर्वे, तिवारी यांच्यावर गुन्हा नोंदविण्यात आला आहे.
दोन्ही प्रकरणांत एकच प्रकार दिसून आला असून स्वस्तात म्हाडा घर मिळवून देण्याचे आमिष दाखवत सर्वसामान्य नागरिकांची फसवणूक केली जात असल्याचे स्पष्ट झाले आहे.पोलीसांनी संबंधित सहा आरोपींविरोधात फसवणूक व विश्वासघाताचे गुन्हे दाखल करून पुढील तपास सुरू केला आहे.
