मुंबई | प्रतिनिधी
रात्रीच्या शांततेचा फायदा घेत सार्वजनिक ठिकाणी मोबाईल चोरी करणाऱ्या सराईत आरोपीचा भोईवाडा पोलीसांनी पर्दाफाश केला आहे. परिमंडळ ४ च्या पथकाने केलेल्या कारवाईत आरोपीला अटक करण्यात आली असून त्याच्याकडून एकूण ९ मोबाईल फोन जप्त करण्यात आले. जप्त मुद्देमालाची किंमत सुमारे १ लाख रुपये असल्याचे पोलिसांनी सांगितले.
या घटनेची सुरुवात केईएम रुग्णालयातील एका डॉक्टरांचा मोबाईल चोरीला गेल्याने झाली. ४ जानेवारी २०२६ रोजी मध्यरात्री ते पहाटे दरम्यान घडलेल्या या चोरीनंतर भोईवाडा पोलीसांनी तपास सुरू केला. या प्रकरणी गुन्हा रजि. क्र. ०९/२०२६ अंतर्गत कलम ३०३(२) भा.न्या.सं. नुसार गुन्हा दाखल करण्यात आला.
तपासादरम्यान पोलिसांनी परिसरातील ४० ते ५० सीसीटीव्ही कॅमेऱ्यांचे फुटेज तपासत आरोपीच्या हालचालींचा मागोवा घेतला. तांत्रिक विश्लेषणातून फिरोज इस्माईल शेख (वय ४०) हा सराईत गुन्हेगार असल्याचे निष्पन्न झाले. तो विशेषतः मध्यरात्री हॉस्पिटल परिसरात येऊन मोबाईल चोरी करत असल्याची बाब तपासात उघड झाली.
यानंतर गुन्हे प्रकटीकरण पथकाने काही दिवस गुप्त पाळत ठेवत सापळा रचला. अखेर १६ फेब्रुवारी २०२६ रोजी पहाटे १ वाजता आरोपी चोरीच्या उद्देशाने परिसरात आल्यावर त्याला ताब्यात घेण्यात आले. अंगझडतीत २ मोबाईल मिळाले, तर पुढील चौकशीत आणखी ७ मोबाईल जप्त करण्यात आले.
ही कारवाई मुंबई पोलीस आयुक्तालयाच्या मार्गदर्शनाखाली परिमंडळ ४ च्या पथकाने यशस्वीरीत्या पार पाडली असून आरोपीविरुद्ध पुढील तपास सुरू आहे.
