‘वंचित’चे दोन नगरसेवक शिवसेनेकडे
ठाणे : अजय मगरे
उल्हासनगर महानगरपालिकेतील राजकीय समीकरणांना नवे वळण मिळाले असून वंचित बहुजन आघाडीकडून निवडून आलेल्या दोन नगरसेवकांनी शिवसेनेला आपला जाहीर पाठिंबा दिला आहे. या घडामोडीमुळे महापालिकेतील सत्तासमीकरणांमध्ये मोठा बदल होण्याची शक्यता व्यक्त केली जात आहे.
वंचित बहुजन आघाडीकडून निवडून आलेल्या सुरेखा सोनावणे आणि विकास खरात या नगरसेवकांनी उपमुख्यमंत्री एकनाथ शिंदे यांची मुंबईतील निवासस्थानी भेट घेत पाठिंब्याचे पत्र त्यांना सुपूर्द केले. या भेटीदरम्यान कल्याण–डोंबिवलीचे खासदार डॉ. श्रीकांत शिंदे उपस्थित होते.
आपल्या प्रभागाचा सर्वांगीण विकास व्हावा, तसेच दलित वस्ती सुधार योजनेअंतर्गत प्रलंबित आणि नवीन विकासकामे मार्गी लागावीत, या उद्देशाने शिवसेनेला पाठिंबा देत असल्याचे नगरसेवकांनी यावेळी उपमुख्यमंत्री शिंदे यांना स्पष्ट केले.
या प्रसंगी आमदार डॉ. बालाजी किणीकर, माजी नगराध्यक्ष सुनील चौधरी, नगरसेवक योगेश जानकर तसेच शिवसेनेचे प्रवक्ते राहुल लोंढे उपस्थित होते. या राजकीय घडामोडीमुळे उल्हासनगर महापालिकेतील आगामी निर्णयप्रक्रिया आणि सत्तासमीकरणांकडे सर्वांचे लक्ष लागले आहे.
