राज्यातील १६ विभागांतील लोकप्रतिनिधी, पदाधिकारी व कार्यकर्त्यांचा मोठ्या उत्साहात शिवसेनेत प्रवेश….
“स्पीड ब्रेकर सरकार गेलं, विकासाचं इंजिन वेगात” — उपमुख्यमंत्री एकनाथ शिंदे यांचा विरोधकांवर टोला…
ठाणे, दि. १० : अजय मगरे
ठाण्यात आज उपमुख्यमंत्री एकनाथ शिंदे यांच्या उपस्थितीत राज्यातील विविध १६ विभागांमधील लोकप्रतिनिधी, पदाधिकारी आणि असंख्य कार्यकर्त्यांनी शिवसेनेत जाहीर प्रवेश केला. या ‘महाशक्तीप्रवेश’ सोहळ्यात शिंदे यांनी विरोधकांवर जोरदार प्रहार करत सांगितले की, “आजच्या या प्रवेशामुळे शिवसेना अधिक सबळ झाली आहे. शिवसेनेचा भगवा प्रत्येक नगरपालिकेवर फडकणार, यात शंका नाही,” असा ठाम विश्वास त्यांनी व्यक्त केला.
शिंदे म्हणाले, “महाविकास आघाडीच्या काळात विकासाच्या वाटेवर ‘स्पीड ब्रेकर’ लावण्यात आले होते. मात्र आम्ही सत्तेत आल्यानंतर ते सारे अडथळे दूर करून विकासाला गती दिली. ‘मुख्यमंत्री माझी लाडकी बहीण’, ‘लेक लाडकी लखपती’ आणि विविध महिला सक्षमीकरण योजना या आमच्या सरकारच्या संवेदनशील भूमिकेचं उदाहरण आहेत.”
विरोधकांवर टीका करताना त्यांनी म्हटलं, “आम्ही दिलेला शब्द पाळतो, प्रिंटिंग मिस्टेकच्या सबबी देत नाही. विरोधकांकडे मुद्दे नाहीत, त्यामुळे ते केवळ आरोप करत बसले आहेत. पण माझं उत्तर म्हणजे माझं काम आहे.”
शेतकऱ्यांच्या प्रश्नांवर बोलताना शिंदे म्हणाले, “अवकाळी पावसामुळे संकटात सापडलेल्या शेतकऱ्यांच्या पाठीशी सरकार ठामपणे उभं आहे. त्यांना मदतीचा हात देणं हे आमचं कर्तव्य आहे.”
मुंबईतील विकासकामांचा आढावा घेताना शिंदे म्हणाले, “कोस्टल रोड, मुंबई ट्रान्स हार्बर लिंक, मेट्रो आणि सर्व रस्त्यांचं कॉंक्रिटीकरण ही कामं आम्ही मार्गी लावली आहेत. आता मुंबईत खड्डा शोधूनही मिळणार नाही!”
कार्यकर्त्यांना आवाहन करत त्यांनी सांगितले, “आगामी नगरपालिका, जिल्हा परिषद आणि महापालिका निवडणुकांमध्येही महायुतीचा भगवा झेंडा फडकवायचा आहे. शिवसेना हा कार्यकर्त्यांचा पक्ष आहे, इथे कोणी मालक नाही, कोणी नोकर नाही. जो काम करेल तोच पुढे जाईल.”
शेवटी नव्याने प्रवेश केलेल्या कार्यकर्त्यांचे स्वागत करत शिंदे म्हणाले, “विकास, विश्वास आणि बाळासाहेब ठाकरे यांच्या विचारांनी चालणारी हीच खरी जनतेची शिवसेना आहे!”
याप्रसंगी उबाठा सचिव व प्रवक्ता डॉ. संजय लाखे पाटील, धुळे येथील नगरसेवक जितेंद्र जगताप, विनोद जगताप, वसंत पावरा, मनसे माथाडी उपाध्यक्ष प्रथमेश चव्हाण, अमित जंगम (रायगड), गोपीनाथ संसारे, विकी जाधव, शमशुद्दीन शेख आदींसह अनेकांनी मोठ्या उत्साहात शिवसेनेत प्रवेश केला.
कार्यक्रमाला शिवसेना सचिव राम रेपाळे, उपनेते दत्ता दळवी, उपनेत्या सुवर्णा करंजे, धुळे जिल्हाप्रमुख मनोज मोरे, सतीश महाले, मा. नगरसेवक पांडुरंग पाटील, एकनाथ भोईर यांच्यासह अनेक मान्यवर उपस्थित होते.
