मुंबई, दि.२२.अजय मगरे
राज्याच्या पर्यावरण व पशुसंवर्धन मंत्री पंकजा मुंडे यांच्या प्रभावी नेतृत्वाची दखल घेत सुप्रसिद्ध इंग्रजी मासिक सोसायटी अचिव्हर्स यांनी त्यांच्या विशेष मुलाखतीसह त्यांना कव्हर पेजवर स्थान दिले आहे.“देअर इज नो सबस्टिट्यूट फॉर इथिकल लीडरशीप” या शब्दांत त्यांच्या राजकीय व सामाजिक प्रवासाचा गौरव करण्यात आला आहे.
मासिकाची स्पेशल एडिशन यंदा प्रकाशित झाली असून देश-विदेशातील वाचकवर्गात ती पोहोचली आहे. अभ्यासू, धडाडीच्या आणि लोकाभिमुख निर्णय घेणाऱ्या नेत्या म्हणून पंकजा मुंडे यांनी राज्याच्या राजकारणात स्वतंत्र ओळख निर्माण केली आहे. पर्यावरण, वातावरणीय बदल आणि पशुसंवर्धन विभागात मंत्री म्हणून त्यांनी घेतलेल्या पुढाकारांचा सविस्तर आढावा या मुलाखतीत मांडण्यात आला आहे.
मॅगझिनच्या संपादिका अँड्रिया कोस्टबीर यांनी ही विशेष मुलाखत घेतली असून पंकजा मुंडे यांच्या कार्यप्रवासातील विविध टप्पे आकर्षक छायाचित्रांसह सादर करण्यात आले आहेत. या विशेष अंकात विविध क्षेत्रातील कर्तृत्ववान महिलांच्या मुलाखतींचाही समावेश करण्यात आला आहे.
शनिवारी रामटेक येथील शासकीय निवासस्थानी संपादिका अँड्रिया कोस्टबीर आणि अशोक धामणकर यांनी मंत्री पंकजा मुंडे यांच्या हस्ते या स्पेशल एडिशनचे प्रकाशन केले.यावेळी माध्यमांशी बोलताना पंकजा मुंडे म्हणाल्या, “सोसायटी अचिव्हर्स मॅगझिनने त्यांच्या कव्हर स्टोरीमध्ये मला स्थान दिल्याबद्दल मी संपूर्ण टीमचे मनापासून आभार मानते. माझ्या प्रवासाची झलक या अंकातून वाचकांसमोर येत आहे, ती नक्की वाचा,” असे आवाहन त्यांनी केले.
