ठाणे,दि.४ ( अजय मगरे )
शहराच्या सांस्कृतिक विकासाला नवे आयाम देणारा महत्त्वाकांक्षी प्रकल्प घोडबंदर रोडवरील वाघबीळ परिसरात साकार होणार आहे. ‘निरुपणकार तीर्थरूप आप्पासाहेब धर्माधिकारी नाट्यगृह’ असे या भव्य प्रकल्पाचे नाव असून, हे नाट्यगृह राज्यातील सर्वात मोठ्यांपैकी एक ठरणार आहे. या प्रकल्पाची माहिती देण्यासाठी आज पत्रकार परिषद आयोजित करण्यात आली होती.
सुमारे २५०० प्रेक्षक क्षमतेचे हे नाट्यगृह ७३०० चौ.मी. क्षेत्रफळावर उभारले जाणार आहे. मुख्य सभागृहासोबतच बाल्कनी व्यवस्था, भव्य रंगमंच आणि अत्याधुनिक तंत्रज्ञानाच्या सुविधांमुळे मोठ्या प्रमाणात नाट्यप्रयोग व सांस्कृतिक कार्यक्रम सादर करणे शक्य होणार आहे.
प्रेक्षकांच्या सोयीसाठी आधुनिक आसनव्यवस्था, लिफ्ट, एस्कलेटर, स्वच्छतागृहे तसेच दिव्यांगांसाठी विशेष सुविधा उपलब्ध करून देण्यात येणार आहेत. कलाकारांसाठी स्वतंत्र बॅकस्टेज सुविधा आणि मोठा बँक्वेट हॉल देखील उभारण्यात येणार आहे.
नाट्यगृहाच्या परिसरात प्रशस्त प्लाझा, आकर्षक उद्यान आणि लाईव्ह कार्यक्रमांसाठी मोकळी जागा विकसित करण्यात येणार आहे. यासोबतच तीन मजली वाहनतळाची सुविधा उपलब्ध करून देण्यात येणार आहे.
या प्रकल्पाच्या पुढील नियोजनासाठी लवकरच रंगकर्मी, दिग्दर्शक आणि कलाकारांची बैठक घेण्यात येणार असून, त्यांच्या सूचनांनुसार कामाला गती दिली जाणार आहे.
एकंदरीतच, वाघबीळ येथे उभारले जाणारे ‘आप्पासाहेब धर्माधिकारी नाट्यगृह’ ठाणे शहराच्या सांस्कृतिक वैभवात भरीव भर घालणारे ठरणार आहे.
