ठाणे, दि.५ ( अजय मगरे )
परेरा नगर, पाडा क्रमांक ३, लोकमान्य नगर येथील श्रीमती द्रोपदाबाई जगदीश इंदिसे विद्यामंदिर येथे रविवार, दिनांक ४ जानेवारी २०२६ रोजी माजी विद्यार्थी मेळावा उत्साहपूर्ण व भावनिक वातावरणात संपन्न झाला. या मेळाव्याच्या अध्यक्षा माननीय उषा संजय इंदिसे मॅडम होत्या. कार्यक्रमाला माजी विद्यार्थ्यांचा मोठ्या प्रमाणावर उत्स्फूर्त प्रतिसाद लाभला.
कार्यक्रमाची सुरुवात शाळेच्या घंटानादाने करण्यात आली. त्यानंतर परिपाठ घेण्यात आला. परिपाठानंतर अनेक माजी विद्यार्थ्यांनी आपल्या शालेय आठवणी, शिक्षकांप्रती असलेली कृतज्ञता आणि शाळेशी असलेली आपुलकी शब्दांत व्यक्त केली. त्यांच्या मनोगतांमुळे संपूर्ण वातावरण भावनिक झाले आणि उपस्थितांना जुन्या आठवणींना उजाळा मिळाला.
यानंतर शाळेच्या आदरणीय मुख्याध्यापिका जाधव मॅडम यांनी माजी विद्यार्थ्यांबद्दल आपले मनोगत व्यक्त केले. माजी विद्यार्थ्यांनी विविध क्षेत्रांत मिळवलेल्या यशाबद्दल त्यांनी समाधान व्यक्त करत शाळेशी असलेली नाळ कायम ठेवण्याचे आवाहन केले.
कार्यक्रमात शिक्षकांसाठी मनोरंजनात्मक उपक्रम म्हणून एक छोटासा खेळ आयोजित करण्यात आला. या खेळामध्ये सर्व शिक्षकांनी उत्साहाने सहभाग घेतल्याने कार्यक्रमात आनंदी व स्नेहपूर्ण वातावरण निर्माण झाले. शिक्षक व माजी विद्यार्थ्यांमधील आपुलकी अधिक दृढ झाल्याचे यावेळी पाहायला मिळाले.
कार्यक्रमाच्या शेवटी माजी विद्यार्थ्यांनी आपल्या जीवनाला दिशा देणाऱ्या, मार्गदर्शन करणाऱ्या व संस्कार देणाऱ्या सर्व शिक्षकांचे मनःपूर्वक आभार मानले. माजी विद्यार्थ्यांच्या संयुक्त पुढाकारातून आयोजित करण्यात आलेला हा मेळावा केवळ कार्यक्रम न राहता नात्यांचा उत्सव ठरला.
आठवणींना उजाळा देणारा आणि शाळेशी असलेली नाळ अधिक घट्ट करणारा हा माजी विद्यार्थी मेळावा उपस्थित सर्वांसाठी अविस्मरणीय ठरला.
