मुंबई, दि. २५ : अजय मगरे
वांद्रे ते कुर्ला दरम्यानचा पॉड टॅक्सी प्रकल्प हा देशातील पहिला आणि एकमेव प्रकल्प असून तो मॉडेल प्रकल्प म्हणून राबविण्यात यावा, अशा सूचना उपमुख्यमंत्री एकनाथ शिंदे यांनी अधिकाऱ्यांना दिल्या. या प्रकल्पाला गती देण्याचेही त्यांनी स्पष्ट निर्देश दिले.
उपमुख्यमंत्री शिंदे यांच्या निवासस्थानी आज पॉड टॅक्सी संदर्भात सादरीकरण करण्यात आले. या वेळी अपर मुख्य सचिव असीम गुप्ता, प्रधान सचिव नविन सोना, मुंबई महानगर प्रदेश विकास प्राधिकरणाचे आयुक्त संजय मुखर्जी, अतिरिक्त आयुक्त, विक्रम कुमार,अश्विन मुदगल, पोलिस महानिरीक्षक अनिल कुंभारे आदी मान्यवर उपस्थित होते.
“परिवहन सेवेचे पुढचे पाऊल म्हणजे पॉड टॅक्सी. वांद्रे आणि कुर्ला रेल्वे स्थानकादरम्यान असलेल्या बीकेसी परिसरात दररोज लाखो नागरिकांची ये-जा होत असते. या वाढत्या वर्दळीवर नियंत्रण ठेवण्यासाठी आणि नागरिकांना वाहतूक कोंडीतून दिलासा मिळवून देण्यासाठी पॉड टॅक्सी उपयुक्त ठरेल,” असे शिंदे म्हणाले.
वांद्रे ते कुर्ला या ८ किमी अंतरामध्ये ३३ स्थानके प्रस्तावित असून प्रकल्प सुरू झाल्यानंतर खासगी वाहनधारकांची संख्या घटेल. परिणामी रस्त्यावरील वाहतूक कोंडी कमी होऊन नागरिकांचा वेळ आणि इंधनाची मोठ्या प्रमाणावर बचत होईल, असेही उपमुख्यमंत्र्यांनी स्पष्ट केले.
