मुंबई, दि.१७.( प्रतिनिधी)
ता. पोलादपूर | जि. रायगड
बौद्धजन सेवा समिती संघ, ४३ गाव यांच्या संघटक पदासाठी अत्यंत उत्साहात पार पडलेल्या निवडणुकीचा निकाल जाहीर झाला असून विट्ठल मोरे यांनी ८४ मतांच्या फरकाने प्रभावी विजय संपादन केला आहे.
या निवडणुकीत एकूण २५१ मतदारांनी मतदानाचा हक्क बजावला. त्यापैकी विट्ठल मोरे यांना १६४ मते मिळाली, तर दादासाहेब सोनावने यांना ७९ मते मिळाली. तसेच ८ मतदारांनी ‘नोटा’चा पर्याय निवडला. सुरुवातीपासूनच चुरशीची लढत पाहायला मिळाली असली तरी अखेर मोरे यांनी स्पष्ट आघाडी घेत विजयावर शिक्कामोर्तब केले.
निकाल जाहीर होताच परिसरात जल्लोषाचे वातावरण निर्माण झाले. समर्थकांनी घोषणाबाजी करत आनंद व्यक्त केला.
नवनिर्वाचित संघटक विट्ठल मोरे यांनी सर्व मतदारांचे आभार मानत, संघटनेला अधिक बळकट करण्यासाठी आणि ४३ गावांतील सामाजिक उपक्रमांना गती देण्यासाठी कटिबद्ध असल्याचे सांगितले.
संपूर्ण निवडणूक प्रक्रिया शांततेत व पारदर्शक पद्धतीने पार पडली. या निकालामुळे संघटनेत नवचैतन्य निर्माण झाले असून आगामी काळात संघटनेच्या कामकाजाला नवी दिशा मिळण्याची अपेक्षा व्यक्त केली जात आहे.
