अर्जदारांना १५ जुलैला संमती नोंदवण्याचे कोकण मंडळाचे वाहन…
मुंबई,दि.१० : मंगेश म्हात्रे :
कोकण गृहनिर्माण व क्षेत्रविकास मंडळाच्या (म्हाडा) चितळसर मानपाडा, टिकुजिनी वाडी येथील संकेत क्र. १३८ व १३९ या गृहनिर्माण योजनेतील अर्जदारांसाठी १५ जुलै रोजी महत्त्वाची बैठक आयोजित करण्यात आली आहे. पात्र अर्जदारांनी नव्याने निश्चित करण्यात आलेल्या विक्री किंमतींनुसार सदनिकेसाठी आपली संमती नोंदवावी, असे आवाहन म्हाडाच्या वतीने करण्यात आले आहे.
सन २००० मध्ये जाहिरात दिल्यानंतर अर्जदारांकडून अर्ज मागवण्यात आले होते. मात्र या जागेला ठाणे महानगरपालिकेने ‘विस्थापित गृहनिर्माण’ म्हणून आरक्षण दिल्यामुळे योजना वेळेत मंजूर झाली नाही. नंतर २००६ च्या सुमारास स्विस चॅलेंज पद्धतीने बहुमजली इमारती बांधण्याचा प्रस्ताव पुढे आला. आता त्याच पद्धतीने अर्जदारांना सदनिकांचे वितरण करण्याचा प्रस्ताव विचाराधीन आहे.
या अनुषंगाने, अर्जदारांना नव्याने निश्चित झालेल्या किंमतींनुसार सदनिकेत स्वारस्य असल्यास आपले संमतीपत्र व मूळ तसेच छायांकित कागदपत्रांसह येत्या १५ जुलै २०२५ रोजी सकाळी ११ वाजता गुलझारीलाल नंदा सभागृह, म्हाडा गृहनिर्माण भवन, वांद्रे (पूर्व), मुंबई येथे हजर राहण्याचे आवाहन करण्यात आले आहे.
आपली संमती नोंदवली नाही, तर अर्ज रद्द समजून अनामत रक्कम परत केली जाईल, असे म्हाडाच्या मुख्य अधिकारी रेवती गायकर यांनी स्पष्ट केले आहे.
