“आधुनिक तंत्रज्ञानाच्या युगात स्किल अपग्रेडेशन हीच यशाची गुरुकिल्ली” – संजीव जयस्वाल
मुंबई, दि. १७ : मंगेश म्हात्रे
महाराष्ट्र गृहनिर्माण व क्षेत्र विकास प्राधिकरण (म्हाडा) तर्फे भारतरत्न अभियंता सर मोक्षगुंडम विश्वेश्वरय्या यांच्या जयंतीनिमित्त अभियंता दिन उत्साहात साजरा करण्यात आला. या प्रसंगी म्हाडाचे उपाध्यक्ष संजीव जयस्वाल यांनी अभियंत्यांना उद्देशून मार्गदर्शन केले.
“आधुनिक तंत्रज्ञान व कृत्रिम बुद्धिमत्ता (एआय) यामध्ये होत असलेली झपाट्याची प्रगती हे आव्हान आहे. अशा काळात अभियंत्यांनी कौशल्य वृद्धी आणि वैयक्तिक प्रगती यावर लक्ष केंद्रित करणे आवश्यक आहे. टीमवर्क व कार्यक्षमता हीच यशाची खरी गुरुकिल्ली आहे. म्हाडा आज राष्ट्रीय स्तरावर अधोरेखित झाले असून, आगामी काळात आंतरराष्ट्रीय स्तरावर नावलौकिक मिळविण्यासाठी सर्वांनी प्रयत्नशील राहिले पाहिजे,” असे आवाहन श्री. जयस्वाल यांनी केले.
या कार्यक्रमाला मुंबई इमारत सुधार व पुनर्विकास मंडळाचे मुख्य अधिकारी मिलिंद शंभरकर, मुंबई मंडळाचे मुख्य अधिकारी मिलिंद बोरीकर, म्हाडाचे मुख्य अभियंता धीरजकुमार पंदिरकर, महेशकुमार जेसवाणी, ननावरे तसेच उपमुख्य अभियंता राकेश गावीत उपस्थित होते. याशिवाय म्हाडाचे उपमुख्य कार्यकारी अधिकारी अनिल वानखेडे, मुंबई झोपडपट्टी सुधार मंडळाचे मुख्य अधिकारी सतीश भारतीय यांच्यासह म्हाडाचे अनेक अभियंते या कार्यक्रमाला मोठ्या संख्येने उपस्थित होते.
यावेळी म्हाडामधील पदोन्नती प्राप्त अभियंत्यांचा सत्कार करण्यात आला. तसेच म्हाडाचे अभियंता महादेव शितोळे लिखित “जगभरातील भूकंप : स्वरूप, भ्रम आणि वास्तव” या पुस्तकाचे प्रकाशन जयस्वाल यांच्या हस्ते झाले. “भूकंपाच्या वैज्ञानिक कारणांचा अभ्यास व त्याविषयीचे गैरसमज दूर करण्यासाठी हे पुस्तक उपयुक्त ठरेल,” असे त्यांनी यावेळी नमूद केले.
कार्यक्रमादरम्यान एलबी-डब्ल्यूएसपीचे सहाय्यक निवासी अभियंता विश्वास चिंचोरे यांनी “मुंबई-पुणे दुतगती महामार्गावरील मिसिंग लिंक प्रकल्प” या विषयावर व्याख्यान दिले. तर जीवनविद्या मिशनचे उपदेशक प्रल्हाद वामनराव पै यांनी “ताण-तणाव व्यवस्थापन व काम-जीवन समतोल” या विषयावर प्रेरणादायी मार्गदर्शन केले.
