मुंबई, दि.२२ : मंगेश म्हात्रे
सर्वसामान्य नागरिकांचे घराचे स्वप्न पूर्ण करणाऱ्या म्हाडाच्या मुख्यालयाला अवकळा आली आहे. इमारतीच्या दुरुस्तीवर कोट्यवधी रुपये खर्च केल्यानंतरही म्हाडा मुख्यालयात प्लास्टर कोसळण्याच्या घटना घडत आहेत. यामुळे म्हाडा अधिकारी भयभीत झाले आहेत.
म्हाडाच्या मुख्यालयातील दुसऱ्या मजल्यावर असलेल्या विद्युत विभागात आज अचानक स्लॅबचे प्लास्टर कोसळले. हे प्लास्टर थेट उप अभियंत्यांच्या कॅबिनच्या वरून खाली पडले. सुदैवाने या घटनेत कोणतीही जीवितहानी झाली नाही.
घटना घडली त्यावेळी काही कर्मचारी कार्यालयात उपस्थित होते. मात्र प्लास्टर पडण्याच्या ठिकाणी कोणीही नसल्याने मोठी दुर्घटना टळली. या अपघातामुळे कर्मचाऱ्यांमध्ये भीतीचे वातावरण निर्माण झाले असून, इमारतीच्या देखभाल व दुरुस्तीबाबत म्हाडा प्रशासन करोडो रुपये खर्च करीत असून असे प्रकार होत असल्याने प्रश्नचिन्ह उपस्थित झाले आहे.
म्हाडा ही राज्यातील गृहनिर्माण आणि सार्वजनिक बांधकामाशी संबंधित महत्वाची संस्था असून, तिच्या मुख्यालयातच अशा प्रकारच्या घटना घडल्याने आश्चर्य व्यक्त केले जात आहे. कर्मचाऱ्यांनी अनेकदा इमारतीच्या दुरुस्ती व देखभालीसाठी मागण्या केल्या असूनही अद्याप ठोस उपाययोजना झालेल्या नाहीत, अशी माहिती मिळत आहे.
या घटनेनंतर सुरक्षा उपाययोजना तातडीने हाती घ्याव्यात, तसेच इमारतीची संरचना व गुणवत्ता तपासून आवश्यक ती दुरुस्ती करावी, अशी मागणी कर्मचाऱ्यांकडून जोर धरू लागली आहे. अन्यथा भविष्यात गंभीर दुर्घटना होऊ शकते, अशी भीती व्यक्त केली जात आहे.
