कोपरगाव, दि.७. ( दिलीप गायकवाड )
शहरातील मुख्य रस्त्यावर असलेल्या भारतरत्न डॉ. बाबासाहेब आंबेडकर यांच्या भव्य पूर्णाकृती पुतळ्याजवळील भारतरत्न डॉ. बाबासाहेब आंबेडकर मैदान या नामफलकावर लावले जाणारे डिजिटल बॅनर तात्काळ थांबवून मैदान परिसरातील अतिक्रमण हटवावे, अशी मागणी रिपब्लिकन पार्टी ऑफ इंडिया (गवई) पक्षाच्या वतीने करण्यात आली आहे.
याबाबत पक्षाचे आहिल्यानगर जिल्ह्य उपाध्यक्ष अशोक शिंदे ,यांनी कोपरगाव नगरपरिषदेच्या मुख्याधिकाऱ्यांना निवेदन दिले आहे. शहरातील या स्मारक परिसरात भारतरत्न डॉ. बाबासाहेब आंबेडकर मैदान असा मोठा नामफलक लावलेला आहे. मात्र सध्या विविध राजकीय पक्ष, संघटना व कार्यक्रमांचे डिजिटल बॅनर या ठिकाणी नामफलकावर लावले जात असून त्यामुळे मैदानाचा नामफलक झाकला जातो. काही वेळा हा फलकच बॅनर लावण्यासाठी वापरला जात असल्याने आंबेडकर अनुयायांच्या भावना दुखावल्या जात असल्याचे निवेदनात नमूद करण्यात आले आहे.
तसेच मैदान परिसरात बेकायदेशीर फेरीवाले, स्टॉल, फळ-फ्रूट विक्रेते तसेच वाहनांची पार्किंग होत असल्याने अतिक्रमण वाढत आहे. त्यामुळे संबंधित सर्व प्रकारचे अतिक्रमण तात्काळ हटवून मैदान परिसराची स्वच्छता व शिस्त राखावी, अशी मागणीही शिंदे यांनी नगरपरिषद प्रशासनाकडे केली आहे.
