सिंहस्थ कुंभमेळा नियोजनाचा शिर्डीत आढावा
शिर्डी, दि. १६ : दिलीप गायकवाड
नाशिक येथे २०२६–२७ मध्ये होणाऱ्या सिंहस्थ कुंभमेळ्याच्या पार्श्वभूमीवर शिर्डी येथे येणाऱ्या भाविकांची संभाव्य गर्दी लक्षात घेऊन जिल्हा प्रशासनाने तयार केलेला ‘शिर्डी कृती आराखडा’ सर्वसमावेशक असून, भाविकांची सुरक्षा, आरोग्य सुविधा व वाहतूक व्यवस्थापनाला सर्वोच्च प्राधान्य देत या आराखड्याची प्रभावी अंमलबजावणी करावी, असे निर्देश राज्याचे मुख्य सचिव राजेश अग्रवाल यांनी दिले.
सिंहस्थ कुंभमेळ्याच्या पूर्वतयारीचा आढावा घेण्यासाठी शिर्डी येथे आयोजित बैठकीत ते बोलत होते. या बैठकीला नाशिक विभागीय आयुक्त डॉ. प्रवीण गेडाम, जिल्हाधिकारी डॉ. पंकज आशिया, श्री साईबाबा संस्थानचे मुख्य कार्यकारी अधिकारी गोरक्ष गाडीलकर, जिल्हा परिषदेचे मुख्य कार्यकारी अधिकारी आनंद भंडारी, पोलीस अधीक्षक सोमनाथ घार्गे, अपर जिल्हाधिकारी बाळासाहेब कोळेकर, उपविभागीय अधिकारी माणिक आहेर आदी अधिकारी उपस्थित होते.
बैठकीच्या सुरुवातीला जिल्हाधिकारी डॉ. आशिया यांनी सादरीकरणाद्वारे तयारीची सविस्तर माहिती दिली. नाशिक कुंभमेळ्यासाठी येणाऱ्या एकूण भाविकांपैकी सुमारे २० ते २५ टक्के भाविक शिर्डी व शनिशिंगणापूर येथे दर्शनासाठी येण्याची शक्यता गृहीत धरून सूक्ष्म नियोजन करण्यात आले आहे. वाहतूक, पार्किंग, आरोग्य व आपत्ती व्यवस्थापनावर विशेष भर देण्यात आला आहे.
कुंभमेळा कालावधीत वाहतूक कोंडी टाळण्यासाठी ‘एकात्मिक वाहतूक आराखडा’ तयार करण्यात आला आहे. शहराबाहेर व मंदिरालगत सुमारे ९४ हेक्टर क्षेत्रावर ८ नवीन पार्किंग स्थळे निश्चित करण्यात आली असून, स्मार्ट पार्किंग व शटल बस सेवेचा समावेश असेल. आपत्कालीन परिस्थितीत रुग्णवाहिका व अग्निशामक दलाच्या गाड्या १५ ते २० मिनिटांत घटनास्थळी पोहोचण्यासाठी ‘ग्रीन कॉरिडॉर’ची व्यवस्था करण्यात येणार आहे. गर्दी नियंत्रणासाठी संवेदनशील ठिकाणी ड्रोन व सीसीटीव्हीद्वारे नजर ठेवली जाणार आहे.
भाविकांच्या मदतीसाठी विशेष प्रशिक्षित ‘क्राउड मार्शल्स’ तैनात करण्यात येणार आहेत. आरोग्य सुविधांसाठी श्री साईबाबा सुपर स्पेशालिटी हॉस्पिटलसह परिसरातील रुग्णालये सुसज्ज ठेवण्यात येणार असून, अग्निशमन दलासाठी नवीन मल्टीपर्पज वाहने व प्रशिक्षित मनुष्यबळ उपलब्ध करून दिले जाणार आहे.
कनेक्टिव्हिटीच्या दृष्टीने शिर्डी विमानतळाची क्षमता वाढवून दररोज २० उड्डाणांचे नियोजन करण्यात आले आहे. देशातील १३ प्रमुख शहरांशी थेट रेल्वे कनेक्टिव्हिटी तसेच प्रवाशांसाठी नाशिककडे २००, तर छत्रपती संभाजीनगर व पुण्याकडे प्रत्येकी ४० जादा बसेसचे नियोजन करण्यात आले आहे. शनिशिंगणापूर येथेही स्वतंत्र पार्किंग व दर्शन रांगेचे नियोजन करण्यात आले आहे.
या सर्वंकष नियोजनाचे कौतुक करत मुख्य सचिव राजेश अग्रवाल यांनी सर्व विभागांनी समन्वयाने काम करून भाविकांना सुरक्षित व सुलभ दर्शनाची सुविधा उपलब्ध करून द्यावी, अशा सूचना दिल्या.
