मुंबई, दि.१६ : मंगेश म्हात्रे
दक्षिण मध्य मुंबईतील वार्ड क्रमांक १७२ हा भाजपाचा बालेकिल्ला मानला जातो. मात्र आगामी महापालिका निवडणुकीत या बालेकिल्ल्यातच भाजपमध्ये उमेदवारीसाठी चुरस निर्माण झाली असल्याची चर्चा विभागात सुरू आहे.
सायन विभागातील १७२ या वॉर्डातून माजी नगरसेविका राजेश्री शिरवडकर या दोन टर्म विजयी झालेल्या आहेत. स्थानिक आमदार कॅप्टन तमिळ सेल्वन यांना विधानसभेच्या निवडणुकांमध्ये भरघोस आघाडी याच वॉर्डातून मिळालेली आहे. मात्र, आगामी महापालिका निवडणुकीत भाजपामध्येच शिरवडकरांना आव्हान निर्माण झाले असल्याची चर्चा आहे.
भाजप नेते प्रसाद लाड यांचे समर्थक आशिष साळसकर आणि नुकतेच काँग्रेस सोडून भाजपात दाखल झालेले राजू ठक्कर हे दोघेही उमेदवारीसाठी इच्छुक आहेत. साळसकरांचा सुशिक्षित आणि स्थानिक असा चेहरा पक्षात पुढे येत असल्याची चर्चा आहे. दुसरीकडे, राजू ठक्कर हे स्थानिक असले तरी भाजपात नवखे असल्यामुळे उमेदवारीची शक्यता कमी असल्याचे बोलले जात आहे. साळसकर आणि ठक्कर यांची नावे पुढे आल्याने शिरवाडकर की आणखी कोणाला उमेदवारी मिळणार असे चित्र निर्माण झाले आहे.
वार्ड १७२ मध्ये भाजपची उमेदवारी कोणाला मिळणार, हा प्रश्न उपस्थित झाला आहे. शिवसेना किंवा काँग्रेसकडून महाविकास आघाडीच्या माध्यमातून येथे आव्हान उभे राहण्याची शक्यता आहे. शिवसेना मनसे युती झाल्यास मराठी मते मिळवण्यासाठी भाजपला संघर्ष करावा लागू शकतो. भाजपने केलेल्या विकासकामांचा मुद्दा पुन्हा विजय मिळवण्यासाठी मांडला जाणार असला, तरी स्थानिक पातळीवरील अंतर्गत स्पर्धेमुळे निवडणूक रंगतदार होणार हे निश्चित आहे. वार्ड १७२ मध्ये भाजप भाकरी फिरवणार का ? की शिरवडकरांचा प्रभाव कायम राहणार याकडे सगळ्यांचे लक्ष लागले आहे.
महापालिका निवडणूक २०१७ प्रमुख उमेदवारांचे एकूण मतदान …
राजश्री शिरवडकर -भाजप -१३,७३१
उपेंद्र दोशी -काँग्रेस -३८७५
प्रकाश वाघधरे-शिवसेना -३७७८
राजेश केणी -मनसे – ४७३
विशाल दुराफे -राष्ट्रवादी काँग्रेस -२१२
