नाशिक, दि.२६ : अजय मगरे
यशवंतराव चव्हाण महाराष्ट्र मुक्त विद्यापीठाने मे २०२५ च्या अंतिम वर्ष परीक्षेत उत्तीर्ण झालेल्या पदवी, पदविका व पदव्युत्तर विद्यार्थ्यांना ब्लॉकचेन तंत्रज्ञानावर आधारित क्यूआर कोड अंकित डिजिटल गुणपत्रके थेट ईमेलद्वारे उपलब्ध करून दिली आहेत. यामुळे आता विद्यार्थ्यांना नोकरी वा पुढील शैक्षणिक प्रवेशासाठी मूळ गुणपत्रक सोबत बाळगण्याची गरज उरणार नाही.
मा. कुलगुरू प्रा. संजीव सोनवणे यांच्या मार्गदर्शनाखाली विद्यापीठाच्या परीक्षा विभागाने डिसेंबर २०२३ पासून पदवी व पदविका प्रमाणपत्रांवर ब्लॉकचेन क्यूआर कोडचा वापर सुरू केला आहे. या उपक्रमाअंतर्गत यंदाच्या मे २०२५ च्या परीक्षेत उत्तीर्ण झालेल्या एकूण ९२,३१२ विद्यार्थ्यांपैकी ८१,८५३ विद्यार्थ्यांना डिजिटल गुणपत्रके पाठवण्यात आली आहेत. मात्र १०,४५९ विद्यार्थ्यांनी चुकीचा ईमेल आयडी नोंदवल्याने त्यांना गुणपत्रके अद्याप मिळालेली नाहीत.
या विद्यार्थ्यांनी आपले ईमेल व मोबाईल क्रमांक अचूकपणे नोंदवून विद्यापीठाच्या डीयू पोर्टलवर लॉगिन करून माहिती अद्ययावत करावी, असे आवाहन परीक्षा नियंत्रक भटूप्रसाद पाटील यांनी केले आहे.
