संगणकीय सोडत ११ डिसेंबर रोजी होणार ; नागरिकांना दिलासा
मुंबई, दि. २८ : मंगेश म्हात्रे
म्हाडा पुणे मंडळ तर्फे पुणे, पिंपरी-चिंचवड, पीएमआरडीएसह सोलापूर, कोल्हापूर व सांगली जिल्ह्यातील विविध गृहनिर्माण योजनांमधील ४,१८६ सदनिकांच्या विक्री सोडतीसाठी अर्ज सादर करण्याची मुदत आता २० नोव्हेंबर २०२५ पर्यंत वाढवण्यात आली आहे. अर्जदारांना अधिक वेळ मिळावा आणि कागदपत्रांची पूर्तता करण्यास सुलभता यावी, यासाठी ही मुदतवाढ देण्यात आली असल्याचे पुणे मंडळाचे मुख्य अधिकारी राहुल साकोरे यांनी सांगितले.
सुधारित वेळापत्रकानुसार, प्राप्त अर्जांची संगणकीय सोडत दि. ११ डिसेंबर २०२५ रोजी दुपारी १२ वाजता काढण्यात येणार आहे. अर्जदारांना २० नोव्हेंबर रोजी रात्री ११.५९ वाजेपर्यंत ऑनलाइन अनामत रकमेचा भरणा करता येईल, तर २१ नोव्हेंबरपर्यंत RTGS/NEFT द्वारे भरणा करता येईल.
या सोडतीतील घरे चार प्रमुख घटकांमध्ये विभागण्यात आली ती पुढील प्रमाणे म्हाडा गृहनिर्माण योजना (प्रथम येणाऱ्यास प्रथम प्राधान्य) : १,६८३ सदनिका प्रधानमंत्री आवास योजना (शहरी) : २९९ सदनिका,१५% सर्वसमावेशक गृहनिर्माण योजना (PMRDA हद्द) : ८६४ सदनिका,२०% सर्वसमावेशक गृहनिर्माण योजना (PMC, PCMC, PMRDA हद्द) : ३,२२२ सदनिका
अर्जप्रक्रियेकरितानागरिकांनी https://lottery.mhada.gov.in किंवा bookmyhome.mhada.gov.in या संकेतस्थळांवर नोंदणी करावी. तसेच मार्गदर्शन पुस्तिका https://housing.mhada.gov.in या अधिकृत संकेतस्थळावर उपलब्ध आहे.
साकोरे यांनी नागरिकांना आवाहन केले की, म्हाडाने कोणत्याही व्यक्तीला प्रतिनिधी, सल्लागार किंवा प्रॉपर्टी एजंट म्हणून नेमलेले नाही. त्यामुळे अर्जदारांनी कोणत्याही अशा व्यक्तींशी आर्थिक व्यवहार करू नयेत. अन्यथा पुणे मंडळ कोणत्याही फसवणुकीस जबाबदार राहणार नाही, असेही त्यांनी स्पष्ट केले.
अर्ज प्रक्रियेबाबत अधिक माहितीसाठी नागरिकांनी हेल्पलाइन क्रमांक ०२२-६९४६८१०० वर संपर्क साधावा, असे आवाहन करण्यात आले आहे.
