राज्यमंत्री डॉ. पंकज भोयर यांचे निर्देश
मुंबई, दि. ३० ( प्रतिनिधी )
सोलापूर शहरातील ‘रे नगर’ येथे प्रधानमंत्री आवास योजनेअंतर्गत कामगारांसाठी वसाहती उभारण्यात आल्या असून, या वसाहतींमधील रहिवाशांना रोजगार उपलब्ध करून देण्याच्या दृष्टीने ठोस पावले उचलण्याचे निर्देश गृहनिर्माण राज्यमंत्री डॉ. पंकज भोयर यांनी दिले आहेत.
डॉ. भोयर यांच्या अध्यक्षतेखाली मंत्रालयात यासंदर्भात एक उच्चस्तरीय बैठक पार पडली. या बैठकीस आमदार सुभाष देशमुख, उद्योग विभागाचे विकास आयुक्त दिपेंद्र सिंह कुशवाह, गृहनिर्माण विभागाचे उपसचिव अजित कवडे तसेच सोलापूर गारमेंट असोसिएशनचे पदाधिकारी उपस्थित होते.
बैठकीत डॉ. भोयर म्हणाले, “रे नगरमधील रहिवाशांना त्यांच्या राहण्याच्या ठिकाणीच रोजगार मिळावा, यासाठी सहकारी औद्योगिक वसाहती किंवा समूह विकास योजनेच्या माध्यमातून प्रयत्न व्हावेत. उद्योग विभागाच्या समन्वयाने हा प्रस्ताव पुढे नेण्यात यावा.”
याशिवाय, रोजगार निर्मितीसाठी आवश्यक जागा उपलब्ध करून देण्यासाठी म्हाडाच्या माध्यमातून प्रयत्न करण्यात येतील, असेही त्यांनी स्पष्ट केले. संभाव्य पर्यायांची लवकरात लवकर तपासणी करून प्रत्यक्ष अंमलबजावणीसाठी योग्य तो आराखडा तयार करण्यात यावा, असे निर्देशही त्यांनी संबंधित अधिकाऱ्यांना दिले.
ही योजना प्रत्यक्षात आली, तर रे नगरमधील शेकडो कामगारांना आपले घर आणि रोजगार एकाच ठिकाणी मिळून त्यांच्या जीवनात स्थैर्य येईल, असा विश्वास व्यक्त करण्यात आला.
