कोपरगाव,दि.२१ : चंद्रकांत जोर्वेकर
कोपरगाव शहरात श्रावणातील पिठोरी अमावस्या व बैलपोळा सणाच्या पार्श्वभूमीवर साजाच्या दुकानांची मोठी गर्दी पाहायला मिळाली. बैल, गाय, शेळी, मेंढी, गाढव, घोडा यांसारख्या जनावरांना सजवण्यासाठी लागणाऱ्या गैढे, माठवटी, कासरे, घुगराच्या माळा अशा विविध साजाचे साहित्य विक्रीसाठी ठेवण्यात आले आहे. छत्रपती शिवाजी महाराज पुतळ्यापासून ते डॉ. बाबासाहेब आंबेडकर मैदानापर्यंत दुकाने लागून परिसर गजबजून गेला आहे.
गेल्या आठवड्यापासून पावसाचे प्रमाण वाढले असून भाजीपाला व काही पिकांचे मोठे नुकसान झाले आहे. त्यामुळे शेतकरी वर्ग आर्थिक अडचणीत सापडला आहे. अशा परिस्थितीतही बैलपोळा सण साजरा करण्यासाठी शेतकरी उत्साह दाखवत आहेत.
बैलपोळा म्हणजे शेतकरी आणि बैल यांच्यातील अतूट नाते जपणारा सण. बैलांना स्नान घालून, सजवून गावातून मिरवणूक काढली जाते. त्यांना गोडधोड नैवेद्य दाखवून ग्रामदैवताचे दर्शन घडवून पूजा केली जाते. या पारंपरिक पद्धतीनं कोपरगाव परिसरात बैलपोळा सण उत्साहात साजरा होत आहे.
