मुंबई, दि.११ : मंगेश म्हात्रे
म्हाडाच्या मुंबई इमारत दुरुस्ती व पुनर्रचना मंडळाने बृहतसूचीवरील (मास्टर लिस्ट) घरे वितरणासाठी पात्रता निश्चिती आणि ऑनलाईन अर्ज प्रक्रियेला सुरुवात केली आहे. अर्जदारांना ३० सप्टेंबर २०२५, रात्री ११.५९ वाजेपर्यंत masterlist.mhada.gov.in या संकेतस्थळावर अर्ज दाखल करता येणार आहे.
मंडळाच्या अखत्यारीतील उपकरप्राप्त इमारतींतील मूळ रहिवासी अथवा त्यांचे वारसदार, ज्यांना निष्कासन सूचना देऊन संक्रमण शिबिरात हलविण्यात आले आहे आणि ज्यांना अद्याप पुनर्रचित इमारतींमध्ये घर मिळालेले नाहीत, त्यांच्यासाठी ही प्रक्रिया राबवली जात आहे.
अर्जदारांनी म्हाडाच्या अधिकृत संकेतस्थळावरील citizen corner मधील Application for Masterlist या पर्यायाद्वारे नोंदणी करून अर्ज भरावा. नोंदणीसाठी वैध मोबाईल क्रमांक, ई-मेल आयडी, अर्जदाराचा रंगीत फोटो, आधारकार्ड, व्हेकेशन नोटीस, भाडेपावती, विजबिल, संक्रमण शिबीरातील आदेश व इतर संबंधित कागदपत्रांची आवश्यकता आहे.
ऑनलाईन अर्ज सादर केल्यानंतर, अर्जदाराने स्वतः प्रमाणित केलेली कागदपत्रे ३० दिवसांच्या आत म्हाडा मुख्यालय, वांद्रे (पूर्व) येथे प्रत्यक्ष सादर करणे बंधनकारक आहे. सुनावणीवेळी मूळ कागदपत्रे सोबत आणावी लागतील.
यापूर्वी बृहतसूची समितीने पात्र ठरवलेले तसेच ऑनलाईन अर्ज सादर केलेले अर्जदारांना नव्याने अर्ज करण्याची गरज नाही. मात्र, ज्यांनी फक्त ऑफलाईन पद्धतीने अर्ज केले आहेत आणि त्यांचे प्रकरण अद्याप प्रलंबित आहे, त्यांना अनिवार्यपणे नव्याने ऑनलाईन अर्ज दाखल करावा लागणार आहे.
