प्रभाग क्रमांक ८ मध्ये रोटेशननुसार पुरुष आरक्षणाची अनिल जाधव यांची मागणी
कोपरगाव, दि. ९ : दिलीप गायकवाड
कोपरगाव नगरपरिषदेच्या आगामी निवडणुकांसाठी जाहीर झालेल्या आरक्षण यादीनुसार प्रभाग क्रमांक ८ हा अनुसूचित जाती (SC) महिला आरक्षणासाठी राखीव ठेवण्यात आला आहे. मात्र या निर्णयाविरोधात स्थानिक नागरिक अनिल जाधव यांनी हरकत नोंदवत सदर प्रभागात रोटेशन तत्त्वानुसार अनुसूचित जाती पुरुष आरक्षण द्यावे, अशी मागणी केली आहे.
जाधव यांनी नगरपरिषद मुख्याधिकारी यांना दिलेल्या लेखी अर्जात म्हटले आहे की, सन २०१६ च्या नगरपरिषद निवडणुकीत प्रभाग क्रमांक ८ अनुसूचित जाती महिला आरक्षणासाठी राखीव होता. त्यामुळे या वेळी रोटेशननुसार पुरुष उमेदवारासाठी आरक्षण असणे आवश्यक होते. परंतु सध्याच्या अधिसूचनेत पुन्हा अनुसूचित जाती महिला आरक्षण देण्यात आले असून, हे महाराष्ट्र नगरपरिषद अधिनियम १९६५ मधील कलम ९ नुसार रोटेशन तत्त्वाच्या विरोधात आहे, असेही त्यांनी नमूद केले आहे.
जाधव यांनी या संदर्भातील तपासणी करून रोटेशन तत्त्वानुसार सुधारित आरक्षण जाहीर करावे, अशी मागणी केली आहे. तसेच या संदर्भातील प्रत जिल्हाधिकारी, जिल्हा निवडणूक अधिकारी व राज्य निवडणूक आयोगाला देण्यात आली आहे.
लहुजी शक्ती सेनेचे तालुका अध्यक्ष म्हणून कार्यरत असलेले जाधव यांनी सांगितले की, “समान संधी ही लोकशाहीची मूलभूत गरज आहे. रोटेशन पद्धतीचे पालन न झाल्यास सामाजिक न्यायाच्या तत्त्वांवर आघात होईल.”
