पैठण, दि.१४.( अभिजीत सोनवणे )
इंदेगाव ता. पैठण शिवारात शनिवारी (दि. १३ डिसेंबर २०२५) दुपारच्या सुमारास कालव्यात एका अनोळखी पुरुषाचा मृतदेह आढळून आल्याने परिसरात खळबळ उडाली. मृत व्यक्तीचे वय अंदाजे ४० वर्षे असून त्याची ओळख अद्याप पटलेली नाही.
इंदेगाव येथील पोलीस पाटील शिखा रंगनाथ हुबे (वय ३५) यांना दुपारी सुमारे २ वाजता गावातील निवृत्ती सखाराम पोकळे यांनी फोनद्वारे माहिती दिली की उध्दव द्वारकादास नवथर यांच्या शेताजवळील कालव्यात एक पुरुष मृतदेह पाण्यावर तरंगताना दिसत आहे. माहिती मिळताच पोलीस पाटील हुबे यांनी तात्काळ घटनास्थळी जाऊन खात्री केली.
यानंतर पैठण पोलीस ठाण्याशी संपर्क साधण्यात आला. काही वेळातच पोलीस अधिकारी घटनास्थळी दाखल झाले. स्थानिक नागरिकांच्या मदतीने कालव्यातील पाण्यातून मृतदेह बाहेर काढण्यात आला. मृतदेह शवविच्छेदनासाठी शासकीय दवाखाना, पैठण येथे पाठविण्यात आला.
प्राथमिक तपासात सदर व्यक्तीचा मृत्यू पाण्यात बुडून झाल्याचा अंदाज व्यक्त करण्यात आला आहे. याप्रकरणी पैठण पोलीस ठाण्यात अकस्मात मृत्यू नोंद क्रमांक ७०/२०२५ अन्वये कलम १९४ बी.एन.एस.एस. अंतर्गत नोंद करण्यात आली असून पुढील तपास पोलीस उपनिरीक्षक खाडे करीत आहेत.
मृत व्यक्तीची ओळख पटविण्यासाठी पोलीस अधिक तपास करीत असून नागरिकांनी काही माहिती असल्यास पैठण पोलीस ठाण्याशी संपर्क साधावा, असे आवाहन करण्यात आले आहे.
