ठाणे, दि.२७ : अजय मगरे
खोपोलीतील शिवसेनेच्या नवनिर्वाचित नगरसेविका मानसी काळोखे यांचे पती मंगेश काळोखे यांच्या निर्घृण हत्येप्रकरणी दोषींवर मोक्का लावून कठोरात कठोर कारवाई केली जाईल, असे आश्वासन उपमुख्यमंत्री एकनाथ शिंदे यांनी दिले. त्यांनी काळोखे कुटुंबीयांची घरी जाऊन सांत्वनपर भेट घेतली.
या वेळी बोलताना शिंदे म्हणाले की, हे प्रकरण सुडाच्या राजकारणातून घडले असून आरोपींना कोणत्याही परिस्थितीत सोडले जाणार नाही. काही आरोपींना अटक झाली असून उर्वरितांचा शोध सुरू आहे. हा खटला फास्ट ट्रॅक कोर्टात चालवून आरोपींना कठोर शिक्षा मिळवून दिली जाईल, असेही त्यांनी स्पष्ट केले.
यानंतर त्यांनी खोपोली पोलीस ठाण्याबाहेर आंदोलन करणाऱ्या शिवसैनिक व नागरिकांशी संवाद साधला. सात आरोपींना अटक झाली असून अन्यांनाही लवकरच अटक केली जाईल. काळोखे कुटुंबाला न्याय मिळेपर्यंत शिवसेना स्वस्थ बसणार नाही, असा निर्धार त्यांनी व्यक्त केला.
या वेळी आमदार महेंद्र थोरवे यांच्यासह शिवसेनेचे स्थानिक पदाधिकारी व कार्यकर्ते उपस्थित होते.
