मुंबई : म्हाडा मुंबई मंडळाच्या २,६४० घरांच्या संगणकीय सोडतीसाठी अर्ज करण्याची मुदत पुन्हा एकदा वाढवण्यात आली आहे. ऑनलाइन अर्ज नोंदणी आणि अनामत रक्कम भरण्याची अंतिम मुदत आता २८ मेपर्यंत करण्यात आली असून, त्यामुळे इच्छुक अर्जदारांना मोठा दिलासा मिळाला आहे.
यापूर्वीही सोडतीसाठी मुदतवाढ देण्यात आली होती. मात्र, पुन्हा एकदा अर्ज प्रक्रिया वाढवल्याने सोडतीतील प्रतिसाद, घरांच्या किंमती आणि उत्पन्न गटांमधील बदल यावर चर्चा सुरू झाली आहे.
मुंबई मंडळाने यावेळी विक्रोळी येथील कन्नमवार नगर प्रकल्पातील १,२३२ घरांपैकी ६१० सदनिका केवळ उच्च उत्पन्न गटासाठी (HIG) उपलब्ध करून देण्याचा निर्णय घेतला आहे. या घरांसाठी स्वतंत्र संकेत क्रमांक तयार करण्यात आले असून, त्यांच्या किंमतीत यापूर्वी जाहीर केलेली ७.५ टक्के कपात कायम ठेवण्यात आली आहे. तसेच प्रत्येक घरासोबत एक वाहनतळ विनामूल्य देण्याचाही निर्णय मंडळाने घेतला आहे.
विक्रोळीतील ६१० घरे आता फक्त HIG साठी
कन्नमवार नगर प्रकल्पातील घरांच्या किंमती साधारणपणे १ कोटी ३९ लाख रुपयांपासून १ कोटी ७९ लाख रुपयांपर्यंत आहेत. बिल्डिंग क्रमांक २ आणि ३ मधील सदनिकांचा उच्च उत्पन्न गटात समावेश करण्यात आला आहे. या बदलामुळे उच्च उत्पन्न गटातील ग्राहकांना आकर्षित करण्याचा प्रयत्न असल्याचे मानले जात आहे.
म्हाडा मुंबई मंडळाने मार्च २०२६ मध्ये मुंबईतील विविध भागांतील २,६४० घरांची सोडत जाहीर केली होती. यामध्ये विक्रोळी, गोरेगाव, बोरीवली, चेंबूर, वडाळा, पवई, माजगाव आणि इतर भागांतील घरांचा समावेश आहे.
या सोडतीत अल्प उत्पन्न गटासाठी १८५, निम्न उत्पन्न गटासाठी ५८६, मध्यम उत्पन्न गटासाठी ७९८ आणि उच्च उत्पन्न गटासाठी ८३१ सदनिका उपलब्ध आहेत.
महत्त्वाच्या तारखा
- ऑनलाइन अर्जाची अंतिम मुदत : २८ मे रात्री ११.५९ वाजेपर्यंत
- अनामत रक्कम भरण्याची अंतिम मुदत : २९ मे
- अर्जांची प्राथमिक यादी : १० जून
- अंतिम यादी प्रसिद्ध : १६ जून
- सोडतीची तारीख आणि वेळ : नंतर जाहीर होणार
