दावरवाडी,दि.२७ ( अभिजित सोनवणे)
कुतुबखेडा (ता. पैठण) येथील जिल्हा परिषद उच्च प्राथमिक शाळेत शनिवारी (दि. २७) आनंदनगरी मेळावा मोठ्या उत्साहात पार पडला. या मेळाव्याचे उद्घाटन रेणुकादेवी शरद सहकारी साखर कारखान्याचे व्हा. चेअरमन नंदकुमार पठाडे यांच्या हस्ते करण्यात आले.
या आनंदनगरी मेळाव्यात शंभरहून अधिक विद्यार्थ्यांनी सहभाग घेत खाद्यपदार्थ, विविध खेळणी तसेच शालेय साहित्याची दुकाने थाटली होती. विद्यार्थ्यांनी स्वतः तयार केलेल्या वस्तूंना पालकांकडून चांगला प्रतिसाद मिळाला. पालकांनी भरभरून खरेदी करत आपल्या पाल्यांचे कौतुक केले.
या प्रसंगी बाजार समितीचे संचालक परसराम हजारे, शालेय व्यवस्थापन समितीचे अध्यक्ष संतोष नरवडे, मुख्याध्यापक प्रभाकर गलांडे, बडे बी.बी., कराड बी.पी., कपटी डी.ए. यांच्यासह सरपंच, उपसरपंच, ग्रामपंचायत सदस्य तसेच पालक-शिक्षक मोठ्या संख्येने उपस्थित होते.
मेळाव्यामुळे विद्यार्थ्यांमध्ये व्यवसायिक कौशल्य, आत्मविश्वास व आर्थिक व्यवहाराचे प्राथमिक ज्ञान विकसित होत असल्याचे मत मान्यवरांनी व्यक्त केले.
छायाचित्र:
कुतुबखेडा जि. प. शाळेत आनंदनगरी मेळाव्याचे उद्घाटन करताना रेणुकादेवी शरद सहकारी साखर कारखान्याचे व्हा. चेअरमन नंदकुमार पठाडे, सोबत परसराम हजारे, मुख्याध्यापक प्रभाकर गलांडे व पालक.
