आज संध्याकाळी ५ ते रात्री १० दरम्यान काही मार्ग बंद, पर्यायी मार्गांचा वापर करण्याचे पोलिसांचे आवाहन
मुंबई | मंगेश म्हात्रे
डॉ. बाबासाहेब आंबेडकर यांच्या १३५ व्या जयंतीनिमित्त दादरच्या शिवाजी पार्क मैदानावर रविवारी (१० मे २०२६) भव्य ड्रोन शोचे आयोजन करण्यात आले आहे. यापूर्वी १३ एप्रिल रोजी होणारा हा कार्यक्रम आशा भोसले यांच्या निधनानंतर जाहीर करण्यात आलेल्या शासकीय दुखवट्यामुळे रद्द करण्यात आला होता. आता नव्याने आयोजित करण्यात आलेल्या या कार्यक्रमासाठी मोठ्या प्रमाणावर नागरिक उपस्थित राहण्याची शक्यता असून, त्यानिमित्त मुंबई वाहतूक पोलिसांनी विशेष वाहतूक अधिसूचना जारी केली आहे.
कार्यक्रमाच्या पार्श्वभूमीवर सायंकाळी ५ ते रात्री १० या वेळेत शिवाजी पार्क परिसरातील काही प्रमुख रस्त्यांवर वाहतूक बंद ठेवण्यात येणार आहे, तर काही मार्गांवर एकमार्गी वाहतूक लागू करण्यात येणार आहे.
दक्षिण आणि उत्तर केळूस्कर मार्गावर सर्व प्रकारच्या वाहनांना प्रवेश बंद राहणार असून, केवळ आमंत्रित वाहनांनाच प्रवेश दिला जाणार आहे. तसेच एस. के. बोले रोड हा सिद्धीविनायक मंदिर जंक्शन ते पोर्तुगीज चर्च जंक्शनदरम्यान एकमार्गी करण्यात आला आहे.
याशिवाय स्वातंत्रवीर सावरकर मार्ग सिद्धीविनायक जंक्शन ते यस बँक जंक्शनदरम्यान वाहतुकीसाठी पूर्णतः बंद राहणार आहे. पश्चिम उपनगरांकडे जाणाऱ्या वाहनांसाठी एस. के. बोले रोड, गोखले रोड, गडकरी जंक्शन आणि एल. जे. रोडमार्गे पर्यायी मार्ग निश्चित करण्यात आला आहे.
दक्षिण मुंबईकडे जाणाऱ्या वाहनांसाठी एस. व्ही. एस. रोड, पांडुरंग नाईक मार्ग, राजा बडे चौक आणि गोखले रोडमार्गे पर्यायी व्यवस्था करण्यात आली आहे.
दरम्यान, केळूस्कर मार्ग, पांडुरंग नाईक मार्ग आणि एन. सी. केळकर मार्गावरील काही भागांत नो-पार्किंग लागू करण्यात आले आहे. पोलीस, पीडब्ल्यूडी आणि इतर शासकीय विभागांच्या वाहनांसाठी स्वातंत्रवीर सावरकर स्मारक, वनिता समाज हॉल, महात्मा गांधी जलतरण तलाव आणि कोहिनूर सार्वजनिक वाहनतळ येथे विशेष पार्किंगची सुविधा उपलब्ध करून देण्यात आली आहे.
मुंबई वाहतूक पोलिसांनी नागरिकांना सहकार्य करण्याचे तसेच गर्दी टाळण्यासाठी पर्यायी मार्गांचा वापर करण्याचे आवाहन केले आहे.
