मित्रांनीच रचला होता थरारक कट; हत्या करून मृतदेहासह दुचाकी फोंडा घाटात फेकली
पैशांच्या वादातून मित्राचा काटा; अपघाताचा बनाव करणारे आरोपी अखेर गुन्हे शाखेच्या जाळ्यात
मुंबई : प्रतिनिधी
सिंधुदुर्गातील फोंडा घाटात पाच वर्षांपूर्वी घडलेला एक ‘साधा अपघात’… दरीत पडलेली दुचाकी… बाजूलाच आढळलेला मृतदेह… आणि सर्वांना वाटलं, हा दुर्दैवी अपघात! मात्र या अपघाताच्या आड दडलेलं होतं एक भयानक सत्य. तब्बल पाच वर्षांनंतर मुंबई गुन्हे शाखेने या प्रकरणाचा थरारक पर्दाफाश करत हा अपघात नसून पूर्वनियोजित खून असल्याचे उघड केले आहे.
डिसेंबर २०२१ मध्ये अशफाक मुलानी उर्फ निहाल याला त्याच्याच ओळखीच्या व्यक्तींनी कुडाळ येथील एका हॉटेलमध्ये बोलावले. मात्र ही भेट शेवटची ठरेल, याची कल्पनाही त्याला नव्हती. पैशांच्या देवाणघेवाणीवरून सुरू झालेला वाद टोकाला गेला आणि मित्रांनीच त्याला बेदम मारहाण केली. या मारहाणीत अशफाकचा मृत्यू झाला.
मित्राचा मृत्यू झाल्यानंतर आरोपी घाबरले… पण पोलिसांच्या जाळ्यात अडकू नये म्हणून त्यांनी आणखी मोठा डाव आखला. खुनाचे पुरावे मिटवण्यासाठी मृतदेह आणि दुचाकी घेऊन ते थेट फोंडा घाटात पोहोचले. त्यानंतर मृतदेहासह मोटारसायकल खोल दरीत फेकून हा संपूर्ण प्रकार अपघात असल्याचा बनाव तयार करण्यात आला.
दरीत आढळलेली दुचाकी आणि मृतदेह पाहून सुरुवातीला हा अपघात असल्याचा अंदाज व्यक्त करण्यात आला. वर्षामागून वर्षे गेली… आरोपींना वाटू लागलं की त्यांचा कट कायमचा दडपला गेला आहे. मात्र गुन्हा कितीही हुशारीने लपवला तरी सत्य कधी ना कधी समोर येतंच, हे पुन्हा एकदा सिद्ध झालं.
घाटकोपर गुन्हे शाखा कक्ष-७ च्या पथकाला मिळालेल्या एका गोपनीय माहितीने या पाच वर्षं जुन्या प्रकरणाला नवं वळण दिलं. पोलिसांनी पुन्हा तपासाची चक्रे फिरवली. बारकाईने चौकशी करत एक-एक धागा जोडला आणि अखेर ‘अपघाताच्या मुखवट्यामागे’ लपलेला खुनाचा कट उघडकीस आणला.
या प्रकरणी मनोज भंडगे, सुरेंद्र सोनवडेकर, अतिश मोरे आणि ऋतुराज शेट्टी यांना अटक करण्यात आली असून चौकशीत आरोपींनी गुन्ह्याची कबुली दिल्याची माहिती समोर आली आहे. या कटात आणखी साथीदारांचा सहभाग असल्याचे उघड झाले असून अमित राऊत आणि मनोज भंडारी यांचा शोध पोलीस घेत आहेत.
पाच वर्षं अपघात म्हणून बंद पडलेलं प्रकरण… एका गोपनीय माहितीने पुन्हा उघडलं आणि मित्रांनीच मित्रासाठी रचलेला मृत्यूचा सापळा अखेर जगासमोर आला. गुन्हे शाखा कक्ष-७ ने ‘अपघाताचा बनाव’ फोडत पाच वर्षं दडलेलं खुनाचं गूढ अखेर उकललं आहे.
