मुंबई : प्रतिनिधी
पुण्यात हक्काचे घर घेण्याचे स्वप्न पाहणाऱ्या अर्जदारांसाठी महत्त्वाचा दिवस जवळ आला आहे. म्हाडाच्या पुणे मंडळामार्फत ताथवडे (टप्पा-२) येथील ७९२ सदनिकांची संगणकीय सोडत गुरुवारी, २५ जून रोजी काढण्यात येणार आहे. या लॉटरीसाठी १४२२ अर्जदारांनी अर्ज केले असून सर्वांचे लक्ष निकालाकडे लागले आहे.
पुणे मंडळाचे सभापती शिवाजीराव आढळराव पाटील यांच्या उपस्थितीत दुपारी १२.३० वाजता आगरकर नगर येथील म्हाडा कार्यालयातील सभागृहात ही सोडत पार पडणार आहे.
या प्रकल्पात अल्प उत्पन्न गटासाठी २४ तर मध्यम उत्पन्न गटासाठी ७६८ अशा एकूण ७९२ सदनिका उपलब्ध आहेत. घरांच्या किंमती साधारण ४६ लाख रुपयांपासून ६५.५० लाख रुपयांपर्यंत आहेत.
मुंबई-पुणे महामार्गालगत उभारण्यात येणाऱ्या या प्रकल्पाचे सुमारे ८० टक्के काम पूर्ण झाले असून रहिवाशांसाठी स्विमिंग पूल, क्लब हाऊस, ओपन जिम, मुलांसाठी खेळण्याची जागा, ईव्ही चार्जिंग, सौर ऊर्जा आणि रेन वॉटर हार्वेस्टिंग अशा आधुनिक सुविधा देण्यात येणार आहेत.
