शेतकऱ्यांना वर्ग २ जमिनींवर कर्ज मिळण्यासंदर्भात परिपत्रक पुन्हा निर्गमित होणार..
महसूल मंत्री चंद्रशेखर बावनकुळे यांची घोषणा…
मुंबई, दि. ११ ( प्रतिनिधी )
शेतकऱ्यांना विविध उद्देशांसाठी कर्ज उपलब्ध करून देण्यासाठी भोगावटा वर्ग दोनमधील जमिनी बँका व वित्तीय संस्थांकडे तारण ठेवण्यासंबंधीचे परिपत्रक पुन्हा निर्गमित करण्यात येणार आहे. हे परिपत्रक आधीच निर्गमित झाले असले तरी त्याची माहिती सर्व संबंधित वित्तीय संस्थांना मिळावी आणि शेतकऱ्यांना कर्ज मिळण्यास सुलभता यावी, यासाठी महसूल मंत्री चंद्रशेखर बावनकुळे यांनी हा निर्णय घेतला आहे.या संदर्भात
जिल्हाधिकाऱ्यांनी सर्व बँकांना आवश्यक ती माहिती पुरवावी, असेही निर्देश त्यांनी दिले आहेत.
बैठकीत कर्जपुरवठ्यासंदर्भात चर्चा….
शेतकऱ्यांना अल्प, मध्यम आणि दीर्घ मुदतीच्या तसेच व्यावसायिक कर्ज वाटपाच्या अडचणी सोडवण्यासाठी महसूल मंत्री बावनकुळे यांच्या अध्यक्षतेखाली बैठक पार पडली. या बैठकीस सार्वजनिक बांधकाम मंत्री शिवेंद्रसिंह राजे भोसले, मदत व पुनर्वसन मंत्री मकरंद जाधव पाटील, सातारा जिल्हा बँकेचे अध्यक्ष खासदार नितीन पाटील, बँकेचे संचालक प्रभाकर घार्गे, राजेंद्र राजुपुरे, प्रदीप विधाते, बँकेचे मुख्य कार्यकारी अधिकारी डॉ. राजेंद्र सरकाळे तसेच विविध वरिष्ठ अधिकारी उपस्थित होते.
देवस्थान जमिनी तारण ठेवण्यासंबंधी नवीन निर्णय लवकरच……
देवस्थान इनाम वर्ग ३ (दुमाला), भोगवटा वर्ग २, रेघेखालील कुळ, प्रकल्पाकरिता राखीव इत्यादी प्रकारच्या जमिनी तारण ठेवता येत नसल्याने शेतकऱ्यांना कर्ज मिळण्यास मोठ्या अडचणी येत आहेत. या समस्येवर तोडगा काढण्यासाठी ही बैठक आयोजित करण्यात आली होती.
भोगावटा वर्ग २ जमिनी तारण ठेवण्यास आणि कर्ज थकित झाल्यास त्या जमिनी विक्री करण्यास महाराष्ट्र महसूल अधिनियमात तरतूद आहे. मात्र, या तरतुदींची संपूर्ण माहिती बँकांना उपलब्ध नसल्याने शेतकऱ्यांना कर्ज मिळण्यास विलंब होत आहे. त्यामुळे सर्व जिल्हाधिकाऱ्यांनी ही माहिती बँकांच्या निदर्शनास आणावी, असे निर्देश महसूल मंत्री चंद्रशेखर बावनकुळे यांनी दिले.
