म्हाडा नाशिक मंडळाच्या ५०२ सदनिकांसाठी अर्ज करण्यास २० मार्चपर्यंत मुदतवाढ
मुंबई, दि. ६ मार्च ( प्रतिनिधी )
म्हाडाच्या नाशिक गृहनिर्माण व क्षेत्रविकास मंडळातर्फे ५०२ सदनिकांच्या विक्रीसाठी ऑनलाईन अर्ज करण्याची मुदत २० मार्च २०२५ पर्यंत वाढवण्यात आली आहे. तसेच ऑनलाईन/ऑफलाईन अनामत रकमेचा स्वीकार २१ मार्चपर्यंत केला जाणार आहे, अशी माहिती नाशिक मंडळाचे मुख्य अधिकारी शिवकुमार आवळकंठे यांनी दिली.
नाशिकमधील मखमलाबाद, सातपूर,पाथर्डी, विहितगाव, हिरावाडी, म्हसरुळ, तपोवन, वडाळा, पिंपळगाव बहुला, नांदुर दसक, देवळाली आणि मौजे दसक येथे या सदनिका उपलब्ध आहेत. अर्जदारांना २० मार्चच्या रात्री ११.५९ वाजेपर्यंत अर्ज सादर करता येईल, तर २१ मार्चच्या रात्री ११.५९ वाजेपर्यंत ऑनलाईन अनामत रक्कम भरता येणार आहे.
म्हाडाच्या संकेतस्थळावर (https://housing.mhada.gov.in आणि https://lottery.mhada.gov.in) अर्जाची प्रक्रिया सुरू असून, इच्छुक अर्जदारांनी या संकेतस्थळांना भेट देऊन अर्ज भरावा. सोडतीच्या अंतिम यादीची प्रसिद्धी ९ एप्रिल २०२५ रोजी सायंकाळी ६ वाजता करण्यात येईल.
मुख्य अधिकारी आवळकंठे यांनी स्पष्ट केले की, म्हाडाने कोणत्याही एजंट अथवा प्रतिनिधीची नेमणूक केलेली नाही. अर्जदारांनी कोणत्याही दलालांशी व्यवहार करू नयेत, अन्यथा फसवणुकीसाठी म्हाडा जबाबदार राहणार नाही.
