नाशिकमध्ये बनावट मोजणी नकाशांचा घोटाळा; ४९ जमीनदार आणि बिल्डरांवर गुन्हा दाखल
मुंबई : मंगेश म्हात्रे
आर्थिकदृष्ट्या दुर्बल व अल्प उत्पन्न गटासाठी राखीव असलेला म्हाडाच्या घरांचा २० टक्के कोटा हडप करण्याचा धक्कादायक प्रकार नाशिकमध्ये उघडकीस आला आहे. बनावट मोजणी नकाशे तयार करून प्रशासनाची दिशाभूल केल्याप्रकरणी ४९ जमीनदार आणि बिल्डरांविरोधात नाशिक शहरातील सरकारवाडा पोलीस ठाण्यात गुन्हा दाखल करण्यात आला आहे. या कारवाईमुळे शहरातील रिअल इस्टेट क्षेत्रात मोठी खळबळ उडाली आहे.
या प्रकरणी भूमी अभिलेख विभागाचे बिपीन काजळे यांनी तक्रार दाखल केली आहे. नगरविकास विभागाच्या अधिसूचनेनुसार ४ हजार चौरस मीटरपेक्षा जास्त क्षेत्रावर उभारल्या जाणाऱ्या गृहप्रकल्पांमध्ये २० टक्के जागा आर्थिकदृष्ट्या दुर्बल व अल्प उत्पन्न गटासाठी राखीव ठेवणे बंधनकारक आहे. या अंतर्गत तयार होणारी घरे म्हाडाकडे देणे अपेक्षित असते.
मात्र हा नियम टाळण्यासाठी काही जमीनमालक, बिल्डर आणि त्यांचे अज्ञात सहकारी यांनी संगनमत करून जमिनीचे कागदोपत्री तुकडे करून क्षेत्रफळ ४ हजार चौरस मीटरपेक्षा कमी असल्याचे दाखवले, असा आरोप करण्यात आला आहे. यासाठी बनावट मोजणी नकाशे तयार करून प्रशासनाची दिशाभूल करण्यात आल्याचे तपासात समोर आले आहे.
या प्रकरणाबाबत म्हाडाने शंका उपस्थित केल्यानंतर नाशिक जिल्हाधिकाऱ्यांच्या आदेशानुसार विशेष समितीची स्थापना करण्यात आली होती. या समितीने म्हसरूळ, वडनेर दुमाला, देवळाली, आडगाव, आगारटाकळी, विहितगाव, नाशिक शहर, नांदूर नाका, पंचक, गंगापूर आणि चेहडी या भागांतील १०८ प्रकरणांची चौकशी केली.
चौकशीत ४९ प्रकरणांमध्ये प्रत्यक्ष मोजणी न करता मोजणी झाल्याचे दाखवून बनावट नकाशे तयार केल्याचे प्राथमिक तपासात स्पष्ट झाले. भूमी अभिलेख कार्यालयातील नोंदी तपासल्यावर या प्रकरणांबाबत अधिकृत नोंदीच नसल्याचेही उघड झाले आहे.
तपासादरम्यान काही जणांनी बनावट मोजणी नकाशे तसेच हिस्सा फॉर्म क्रमांक ११ आणि १२ तयार करून ते तहसील कार्यालयात सादर केल्याची शक्यता व्यक्त करण्यात येत आहे.
गरिबांसाठी राखीव असलेली कोट्यवधी रुपयांची जमीन हडप करण्यासाठी हा डाव रचल्याचा आरोप होत असून सरकारवाडा पोलिसांनी या प्रकरणी गुन्हा दाखल केला आहे. या घोटाळ्यात आणखी किती जणांचा सहभाग आहे, याचा पोलीस सध्या पुढील तपास करत आहेत.
