शिरढोण व खोणी येथे शाळा व मल्टीस्पेशालिटी हॉस्पिटलसाठी भूखंड विक्रीसाठी उपलब्ध –
म्हाडाची निविदा प्रक्रिया सुरू
मुंबई, ६ मार्च ( प्रतिनिधी )
म्हाडाच्या कोकण व गृहनिर्माण क्षेत्रविकास मंडळातर्फे शिरढोण व खोणी (ता. कल्याण, जि. ठाणे) येथे प्रधानमंत्री आवास योजना (शहरी) अंतर्गत विकसित होत असलेल्या गृहनिर्माण प्रकल्पात शाळा व मल्टीस्पेशालिटी हॉस्पिटलसाठी भूखंड विक्रीसाठी निविदा प्रक्रिया सुरू करण्यात आली आहे.
या प्रक्रियेत व्यक्ती, संस्था, शिक्षण व आरोग्य संस्था, ट्रस्ट, भागीदारी फर्म, विकासक आदी सहभागी होऊ शकतात. इच्छुकांनी १८ मार्च २०२५ पर्यंत
https://mahatenders.gov.in या संकेतस्थळावर जाऊन निविदा प्रक्रिया पूर्ण करावी, असे आवाहन म्हाडा कोकण मंडळाच्या मुख्य अधिकारी रेवती गायकर यांनी केले आहे.
शिरढोण प्रकल्पातील भूखंड
शिरढोण येथील प्रकल्पामध्ये प्रधानमंत्री आवास योजनेअंतर्गत ७१४१ अत्यल्प उत्पन्न गटासाठी व ५२८ अल्प उत्पन्न गटासाठी सदनिका आहेत. या प्रकल्पात ७६५.६४ चौ.मी. व ५९६.८७ चौ.मी. क्षेत्रफळ असलेले दोन मल्टीस्पेशालिटी हॉस्पिटल भूखंड आणि ३०३३.२५ चौ.मी. व २७६८.६७ चौ.मी. क्षेत्रफळ असलेले दोन शाळांसाठी भूखंड उपलब्ध आहेत.
खोणी प्रकल्पातील शाळेसाठी भूखंड
खोणी येथे प्रधानमंत्री आवास योजनेअंतर्गत ५०६० सदनिकांचे बांधकाम पूर्ण असून ४०४८ सदनिकांना भोगवटा प्रमाणपत्र मिळाले आहे. या प्रकल्पात २४६४.६० चौ.मी. क्षेत्रफळ असलेला शाळेसाठी भूखंड आहे.
या दोन्ही प्रकल्पांत उत्तम पायाभूत सुविधा, वाहतूक सुलभता व भविष्यातील विकासाच्या दृष्टीने प्रचंड संधी उपलब्ध असल्याने शाळा व हॉस्पिटलसाठी हे भूखंड उपयुक्त ठरणार आहेत. अशी माहिती म्हाडाच्या मुख्य जनसंपर्क अधिकारी वैशाली गडपाले यांनी दिली आहे.
