मुंबई | मंगेश म्हात्रे
मुंबईतील अँटॉप हिल परिसरात व्हायरल झालेल्या धक्कादायक व्हिडिओप्रकरणी महत्त्वाची माहिती समोर आली आहे. एका लहान मुलाला चोरून नेत असल्याच्या संशयावरून नागरिकांनी एका महिलेला मारहाण केल्याची घटना घडली होती.
पोलिस तपासात संबंधित महिलेचं नाव कविता सिंग असल्याचं समोर आलं आहे. प्राथमिक माहितीनुसार ती मानसिकदृष्ट्या स्थिर नसल्याचं सांगितलं जात असून सध्या तिच्या नातेवाईकांचा शोध घेण्याचे काम सुरू आहे. तसेच तिची ओळख आणि पार्श्वभूमी पडताळण्याची प्रक्रिया सुरू असल्याची माहिती पोलिसांनी दिली आहे.
दरम्यान, महिलेला मारहाण करणाऱ्या व्यक्तींविरोधात भारतीय न्याय संहिता 87/2026 अंतर्गत कलम 127(2), 115(2), 3(15)प्रमाणे अँटॉप हिल पोलीस ठाण्यात गुन्हा नोंदवण्यात आला आहे. पोलिसांनी गुन्हा दाखल करून पुढील तपास सुरू केला आहे.
या घटनेच्या पार्श्वभूमीवर अफवा आणि संशयाच्या आधारे कायदा हातात घेऊ नये, असं आवाहन अँटॉप हिल पोलिसांकडून नागरिकांना करण्यात आलं आहे.
