शेंद्रा-बिडकीन (ऑरिक) औद्योगिक क्षेत्रात नवीन भूखंड वाटप; २०० कोटींपेक्षा जास्त गुंतवणूक…..
नवी दिल्ली, दि.२३, अजय मगरे
छत्रपती संभाजीनगर येथील शेंद्रा-बिडकीन औद्योगिक क्षेत्र ‘ऑरिक’मध्ये विविध उद्योगांना नवीन भूखंड वाटपास मान्यता देण्यात आली आहे. या प्रकल्पांमधून तब्बल २०० कोटी रुपयांपेक्षा जास्त गुंतवणूक होणार असून सुमारे १ हजार रोजगार निर्माण होण्याची अपेक्षा व्यक्त करण्यात आली आहे.
महाराष्ट्र इंडस्ट्रियल टाउनशिप लिमिटेड (एमआयटीएल) आणि राष्ट्रीय औद्योगिक कॉरिडॉर विकास महामंडळ (एनआयसीडीसी) यांच्या संयुक्त समितीने या वाटपास मान्यता दिली. प्रकल्प प्रस्तावांची तपासणी व्यवहार्यता, उलाढाल, जमीन आवश्यकता आणि विस्तार योजना यावर आधारित होती.
गुंतवणूक व रोजगार निर्मिती
सायन्स फॉर सोसायटी टेक्नो सर्व्हिसेस प्रा. लि. : सेक्टर १२ मध्ये ३७,३८८ चौ.मी. भूखंड; विशेष अन्न घटक प्रकल्पासाठी १०४ कोटींची गुंतवणूक; ३२५ रोजगार.
सु-तंत्रा पेपर प्रॉडक्ट्स प्रा. लि. : सेक्टर ५ मध्ये ३७०.७९ चौ.मी. भूखंड; विद्यमान युनिटच्या विस्तारासाठी गुंतवणूक; उलाढाल ८-१० कोटी.
अलंकार इंजिनीअरिंग इक्विपमेंट्स प्रा. लि. : सेक्टर ५ मध्ये ७,३७८ चौ.मी. भूखंड; रस्ते बांधकाम यंत्रसामग्री प्रकल्पासाठी १७.५ कोटींची गुंतवणूक.
लॉन्बेस्ट इंडिया प्रा. लि. : सेक्टर १२ मध्ये ३७,३८८.७० चौ.मी. भूखंड; इलेक्ट्रॉनिक्स उत्पादन प्रणालीसाठी ११० कोटींची गुंतवणूक; ५०० रोजगार.
ऑरिक : हे भारतातील पहिले ग्रीनफिल्ड स्मार्ट औद्योगिक शहर असून दिल्ली-मुंबई औद्योगिक कॉरिडॉर अंतर्गत विकसित होत आहे. येथे अत्याधुनिक पायाभूत सुविधा, डिजिटल प्रशासन, लॉजिस्टिक्स व निवासी क्षेत्रांचा एकात्मिक संगम उपलब्ध आहे.
केंद्रीय वाणिज्य व उद्योग मंत्री पियुष गोयल आणि डीपीआयआयटी सचिव अमरदीप सिंह भाटिया यांनी अलीकडेच भेट देऊन गुंतवणूकदारांचा आत्मविश्वास वाढविण्यावर भर दिला. शासन सातत्याने उद्योग क्षेत्रातील अडचणी दूर करून गुंतवणूक वृद्धीस चालना देत आहे.
या मंजूर प्रकल्पांमुळे छत्रपती संभाजीनगर परिसरात केवळ गुंतवणुकीत वाढ होणार नाही, तर रोजगार निर्मितीद्वारे स्थानिक अर्थव्यवस्थेलाही मोठा हातभार लागणार आहे.
