मुंबई, दि.१० : मंगेश म्हात्रे
शिवसेनेचा बालेकिल्ला म्हणून ओळखला जाणारा प्रतीक्षा नगर पुन्हा एकदा राजकीय चर्चेच्या केंद्रस्थानी आला आहे. १९९३ पासून सातत्याने या विभागातून शिवसेनेचे नगरसेवक निवडून आले आहेत. मा.शाखाप्रमुख प्रकाश वाघधरे आणि मा. नगरसेवक मंगेश सातमकर या जोडगोळीने तब्बल तीन दशके प्रतीक्षा नगरवर वर्चस्व राखले होते.
मात्र वाघधरे यांच्या निधनानंतर स्थानिक शिवसेनेत फूट पडली, अनेक कार्यकर्त्यांनी पक्ष सोडला, तर २०२२ मधील शिवसेना फुटीनंतर सातमकर यांनी शिंदे गटात प्रवेश केला. २०२५ मध्ये माजी नगरसेवक रामदास कांबळे यांचाही शिंदे गटात प्रवेश झाल्याने ठाकरे गट नेतृत्वहीन झाल्याचे चित्र काही काळ दिसले.
मात्र या संघर्षाच्या काळात माजी नगरसेविका प्रणिता वाघधरे, उपविभागप्रमुख प्रभाकर भोगले आणि शाखाप्रमुख संजय म्हात्रे यांनी ठाकरे गटाची मशाल धगधगत ठेवली. आगामी महापालिका निवडणुकीत या तिघांचे, तसेच सहसंघटक प्रशांत भिसे यांचे नाव उमेदवार म्हणून चर्चेत आहे.
प्रणिता वाघधरे यांना माजी शाखाप्रमुख प्रकाश वाघधरे यांच्या पुण्याईचा लाभ होऊ शकतो.महापालिकेतील कामाचा अनुभव आणि भाषण कौशल्य जमेची बाजू असली तरी वाघधरे यांना मानणारा मोठा वर्ग प्रतीक्षा नगर मध्ये कार्यरत आहे. इतर पक्षातलं अदृश्य सहकार्य प्रणिता वाघधरे यांचं राजकीय समीकरण अधिक बळकट करणार आहे.
प्रभाकर भोगले हे निष्ठावंत चेहरा म्हणून पुढे येत आहेत. गेल्या २५ वर्षांपासून शिवसेनेत कोणतेही मोठे पद नसतानाही आंदोलनातं माध्यमातून स्थानिक प्रश्न मांडत राहिले आहे. लढणारे भोगले यांनी परिणामांची तमा न बाळगता फुटीर नगरसेवकांना जाब विचारायलाही मागे पुढे पाहिलेले नाही, त्यामुळे स्थानिक आणि ठाकरे गटाच्या सहानुभूती लाटेचा फायदा त्यांना होऊ शकतो.
संजय म्हात्रे यांचा शांत आणि संयमी स्वभाव पक्षश्रेष्ठींसाठी सुरक्षित पर्याय ठरू शकतो, तर वार्ड अनुसूचित जाती-जमातीसाठी राखीव झाल्यास प्रशांत भिसे यांच्या नावावर विचार होऊ शकतो.
प्रतीक्षा नगरमधील आगामी निवडणुकीत भाजप व शिंदे गट आव्हान असले तरी,निष्ठावंतांच्या एकजुटीवर ठाकरे गटाची राजकीय मशाल कायम राहते का, याकडे साऱ्यांचे लक्ष लागले आहे.
