विद्यार्थ्यांकडून जल्लोषात सत्कार
कोपरगाव : दिलीप गायकवाड
कोपरगाव तालुक्यातील कोकमठाण गावचे सुपुत्र व भारतीय सैन्य दलातील सेवानिवृत्त जवान संजय चांगदेव दिघे यांनी नुकत्याच झालेल्या अहिल्यानगर जिल्ह्यातील पोलीस भरती परीक्षेत प्रथम क्रमांकाचे गुण मिळवत उल्लेखनीय यश संपादन केले आहे. त्यांच्या या यशामुळे लवकरच ते महाराष्ट्र पोलीस दलात रुजू होणार आहेत.
या यशाबद्दल कोपरगाव नगरपरिषद संचलित भारतरत्न डॉ. बाबासाहेब आंबेडकर सार्वजनिक वाचनालयात विद्यार्थ्यांच्या वतीने त्यांचा सत्कार करून आनंद व्यक्त करण्यात आला. यावेळी फटाक्यांची आतषबाजी, गुलाल उधळून आणि जल्लोषात शाल व पुष्पहार देऊन दिघे यांचा गौरव करण्यात आला.
या सत्कार प्रसंगी ग्रंथालयाचे महेश थोरात, गणेश राक्षे, बहुजन शक्ती न्यूज पोर्टलचे निवासी संपादक दिलीप गायकवाड तसेच विद्यार्थ्यांचा मोठा वर्ग व मित्रपरिवार उपस्थित होता. उपस्थितांनी संजय दिघे यांना पुढील वाटचालीसाठी शुभेच्छा दिल्या.
संजय दिघे यांनी भारतीय सैन्य दलात तब्बल २१ वर्षे ६ महिने देशसेवा बजावली आहे. सेवानिवृत्तीनंतरही जनसेवेची भावना जपण्यासाठी त्यांनी महाराष्ट्र पोलीस दलात प्रवेश करण्याचा निर्धार करून पोलीस भरती परीक्षेची तयारी केली आणि प्रथम क्रमांक मिळवत यश संपादन केले
